Дунё шаҳарлари рейтинги тузилди. Тошкент нечанчи ўринда?

Тошкент Oxford Economics ташкилотининг 2026 йилги “Global Cities Index” рейтингида 343-ўринни эгаллаб, Марказий Осиё шаҳарлари орасида учинчи натижани қайд этди. Бу ҳақда “Global Cities Index” платформасида эълон қилинди.

Рейтинг дунёдаги 1000 та шаҳарни иқтисодиёт, инсон капитали, ҳаёт сифати, атроф-муҳит ва бошқарув каби бешта асосий кўрсаткич бўйича баҳолаган.

Марказий Осиё шаҳарлари орасида энг юқори натижа Қозоғистонга тегишли. Олмаота 265-ўринни, Остона 281-ўринни эгаллаган. Тошкент 343-ўрин билан улардан кейинги поғонадан жой олган. Минтақанинг бошқа шаҳарлари – Бишкек 461-, Ашхобод 668- ва Душанбе 672-ўринда қайд этилган.

Тошкент бир йил ичида рейтингда сезиларли юқорилаган. Ўзбекистон пойтахти ўтган йилги 471-ўриндан 343-ўринга кўтарилган ва 128 поғона “сакраган”.

Шаҳарнинг нисбатан яхши натижасига, асосан, иқтисодиёт ва инсон капитали кўрсаткичлари ҳисса қўшган. Тошкент иқтисодиёт бўйича 54,7 балл билан 188-ўринни, инсон капитали бўйича эса 61,5 балл билан 108-ўринни эгаллаган. Бу натижа Тошкентни ушбу йўналишда дунё шаҳарларининг юқори 20 фоизи қаторига киритган.

Бироқ шаҳарнинг умумий натижасига ҳаёт сифати, атроф-муҳит ва бошқарув кўрсаткичлари салбий таъсир қилган. Тошкент ҳаёт сифати бўйича 47,5 балл билан 644-ўринни эгаллаган. Бу йўналиш аҳолининг фаровонлиги ва қониқиши, молиявий аҳволи, саломатлиги ҳамда шаҳар инфратузилмасидан фойдаланиш имкониятларини қамраб олади.

Шунингдек, атроф-муҳит ҳолати бўйича 806-ўринда ҳамда бошқарув бўйича 825-ўринда қайд этилган.

Oxford Economics Тошкентнинг асосий устунликлари қаторида унинг географик жойлашуви ва малакали ишчи кучини кўрсатган. Шу билан бирга, шаҳарда киши бошига тўғри келадиган ЯИМнинг нисбатан пастлиги ва малакали кадрларни юқори даромадли мамлакатларга йўқотиш хавфи қайд этилган.

Экологик йўналишда эса сув танқислиги Тошкент учун асосий муаммолардан бири сифатида кўрсатилган. Бошқарув кўрсаткичида шаҳар институтларининг барқарорлиги, тартибга солиш сифати ва аҳоли ҳамда бизнес учун яратилган шароитлар баҳоланган.

Тошкент, шунингдек, Oxford Economics томонидан келгусида тез ўсиши мумкин бўлган “кузатувдаги шаҳарлар” қаторига киритилган.

Умумий рейтингда эса Нью-Йорк биринчи ўринни эгаллаган. Ундан кейин Лондон, Париж, Сиэтл ва Сан-Франциско жойлашган. Рейтингнинг кучли шаҳарлари, асосан, юқори иқтисодий салоҳият, малакали аҳоли, ҳаёт сифати ва шаҳар инфратузилмаси билан ажралиб турган.

Эслатиб ўтамиз, аввалроқ дунёдаги энг бахтли сайёҳлик манзили қаерлиги айтилганди.