Беҳаё чиқишлар қилган актрисага чора кўрилди (видео)

Актриса Нилуфар Ҳамидованинг ижтимоий тармоқларда тарқалган беҳаё видеоси жамоатчилик норозилигига сабаб бўлди. Ҳолат юзасидан суриштирув ўтказилиб, унинг хатти-ҳаракатларига ҳуқуқий баҳо бериш учун ҳужжатлар туман судига юборилди. Бу ҳақда Тошкент шаҳар Ички ишлар бош бошқармаси ахборот мультимедиа маркази раҳбар ўринбосари Қаҳрамон Худойберганов ўзининг Instagram’даги саҳифасида маълум қилди.

Ижтимоий тармоқларда тарқалган видеода актрисанинг жамоат жойидаги номақбул ҳаракатлари акс этган. Мазкур ҳолат жамоатчиликнинг кескин эътирозларига сабаб бўлди.

Ҳолат юзасидан муносабат билдирган актриса мамлакат халқидан узр сўраб, бундан буён бундай мазмундаги контентларни тайёрламаслигини айтган.

“Сўнгги сўзим: мен ўзбек халқидан, халқимдан узр сўрайман. Бошқа бундай контентларни чиқармайман. Мана, кўрасизлар. Бундан кейин шундай чиройли контентлар чиқади. Биронтангиз ҳам гап теккизмайсиз, гапирмайсиз”, дейди актриса.

Билдирилишича, ҳозирда ҳолат юзасидан суриштирув ишлари олиб борилмоқда. Фуқаронинг жамоат жойида майда безорилик содир этгани билан боғлиқ хатти-ҳаракатларига ҳуқуқий баҳо бериш ва қонуний чора кўриш учун тўпланган ҳужжатларни туман судига юбориш чоралари кўрилмоқда.