Дебютидаги қизил карточкадан тортиб, жаҳон чемпионлигигача: Мессининг Аргентина терма жамоасидаги йўли

Лионель Месси Аргентина терма жамоаси АҚШда бўлиб ўтган жаҳон чемпионати финалида Испанияга мағлуб бўлганидан етти ҳафта ўтиб халқаро фаолиятини якунлаганини эълон қилди. 2005 йил ёзида майдонга тушганидан бир неча сония ўтиб қизил карточка олган футболчининг 21 йиллик фаолияти 207 та ўйин, 125 та гол, узоқ кутилган жаҳон чемпионлиги ва яна икки Жаҳон чемпионати финалидан сўнг якунланди.

Кеча, 31 август куни Месси Instagram саҳифасида 21 июль куни, жаҳон чемпионати финалидан икки кун ўтиб ёзган хати акс этган суратни жойлаштирди. Унда аргентиналик футболчи миллий терма жамоадаги фаолиятини якунлаётганини тасдиқлади ва август ойи бошида отаси Хорхе вафот этгани уни бу қарорга аввалгидан ҳам кўпроқ ишонтирганини айтди.

“Финалдан бери ўтган вақт ва узоқ мулоҳазадан сўнг, ҳаммага миллий терма жамоадаги фаолиятимни якунлаётганимни эълон қилмоқчиман… Бу оғриқли ва ҳанузгача оғриқ бераётган қарор бўлди, аммо ҳозир энг муносиб вақт эканини тушуниб турибман. Қасам ичаманки, нафақат ҳамма нарсани ютиб олган охирги йилларимизда, балки ундан олдин ҳам доимо бор кучимни берганман, футбол орқали сизга қувонч улашиш ва аргентиналик эканингиздан фахрланишингиз учун ушбу футболка билан доимо курашганман ва бор вужудимни бағишлаганман.
 Вақт оз қолди, боблар ёпилмоқда ва бу боб менга чуқур оғриқ етказмоқда. Мен миллий терма жамоада бўлишни севганман, севардим ва доимо севаман. Мен бор кучимни бердим; берадиган бошқа ҳеч нарсам қолмади, бундан ташқари, ортимдан у ерда бўлишга лойиқ жуда иқтидорли ёш ўйинчилар келмоқда. Бу 20 йил давомидаги барча меҳр-муҳаббатингиз учун ташаккур”.

Месси оиласига “гўзал, аммо қийин саёҳат” давомида унга ҳамроҳ бўлгани учун миннатдорлик билдирди.
Месси ўз баёнотини аргентиналик мухлисларга мурожаат билан якунлади:

“Сизларга ва жамоадошларимга эртакка ўхшаш лаҳзаларни тақдим этганимдан хотиржамлик ва фахр туйғуси билан кетмоқдаман. Буларнинг барчасини сизлар билан бирга бошдан кечириш ажойиб эди. Сизларни севаман! Мени аргентиналик қилганинг учун ташаккур, Худойим! Олға, Аргентина!”

2005 йилда Испания фуқаролигини олган (Аргентина фуқаролигини сақлаб қолган ҳолда) Лионель Месси Испания терма жамоаси сафида ўйнаш ҳуқуқига эга эди. Бироқ у фақат Аргентина терма жамоасида ўйлашни истагани учун Испания футбол федерациясининг таклифини рад этди.

Ўша йили Месси Аргентина ёшлар терма жамоаси билан 20 ёшгача бўлган футболчилар ўртасидаги Жаҳон чемпионатида ғолиб чиқди. Месси эса турнирнинг энг яхши футболчиси ва тўпурари деб топилди. 

Тасаввур қилиш қийин бўлган дебют

2005 йилдан буён Месси Аргентина миллий терма жамоаси сафида тўп тепиб келди. У катталар терма жамоасидаги дебютини 2005 йил 17 август куни 18 ёшида Будапештда Венгрияга қарши ўртоқлик учрашувида ўтказди. Месси 63-дақиқада захирадан майдонга тушди ва орадан атиги икки дақиқа ўтиб, рақиб футболчисига тирсаги билан зарба бергани учун қизил карточка билан майдондан четлатилди. Хуллас дебют мана шундай бошланган.

Месси терма жамоадаги биринчи голини 2006 йил 1 март куни Хорватияга қарши ўртоқлик учрашувида урди. Бироқ Аргентина мазкур баҳсда 2:3 ҳисобида мағлуб бўлди. 2008 йилда Месси Пекин Олимпиадасида олтин медални қўлга киритди. 2011 йилда эса Аргентина терма жамоаси сардорига айланди.

Шунга қарамай, Месси узоқ йиллар давомида терма жамоа билан йирик соврин юта олмаётгани учун танқид қилинди. 2016 йил июнь ойида у Аргентина терма жамоасининг энг яхши тўпурарига айланди. АҚШга қарши Америка Кубоги ярим финалида Месси миллий жамоа учун 55-голини урди ва Габриэл Батистутанинг 54 та голлик натижасидан ўзиб кетди. Аргентина ўша учрашувда 4:0 ҳисобида ғалаба қозонди, аммо финалда Чилига мағлуб бўлди. Бу Мессининг йирик турнирлар финалидаги навбатдаги омадсизлиги эди. У 2007 ва 2015 йиллардаги Америка Кубоги финалларида ҳамда 2014 йилги Жаҳон чемпионати финалида мағлуб бўлганди. 2016 йилги Америка Кубогида Чилига қарши финалдан сўнг Месси терма жамоадаги фаолиятини якунлашини эълон қилди.

“Мен қўлимдан келган барча ишни қилдим. Тўртта финалда иштирок этдим ва чемпион бўла олмаганим ачинарли”, деганди футболчи.

Бу қарор Аргентинада “Кетма, Лео!” шиори остида оммавий кампания бошланишига сабаб бўлди. Мамлакат Президенти Маурисио Макри ҳам футболчини терма жамоада қолишга чақирди. 2016 йил сентябрь ойида Месси Аргентина терма жамоасига қайтди. Шундан сўнг, у жамоа билан бир қатор йирик совринларни қўлга киритди. 2021 йилда у Аргентинани Америка Кубоги финалида Бразилия устидан ғалабага олиб келди. Месси турнирда тўртта гол урди ва бешта голли узатма амалга оширди. Бу Аргентинанинг 28 йил ичидаги илк йирик соврини бўлди.

2022 йил Қатарда ўтказилган Жаҳон чемпионатида Месси еттита гол урди, улардан иккитаси финалда Франция дарвозасига киритилди. Аргентина пенальтилар сериясида Францияни мағлуб этиб, ўз тарихида учинчи марта жаҳон чемпионига айланди. Месси эса фаолияти давомида энг кўп интиқ бўлган совринни қўлга киритди.

2024 йилда Аргентина Америка Кубоги финалида Колумбияни 1:0 ҳисобида мағлуб этди. Лаутаро Мартинес қўшимча вақтда ягона голни урди. Бу ғалаба Месси учун фаолиятидаги 45-соврин бўлди ва у тарихдаги энг кўп соврин ютган футболчига айланди. 2026 йилда Месси яна Аргентина терма жамоасининг Жаҳон чемпионати учун таркибига киритилди. АҚШ, Канада ва Мексикада бўлиб ўтган жаҳон чемпионатида Аргентина яна финалгача етиб борди. Бироқ ҳал қилувчи учрашувда аргентиналиклар Испанияга қўшимча вақтда 0:1 ҳисобида мағлуб бўлди.

Мазкур турнирда ҳам Месси ўз номини тарихга ёзди. 22 июнь куни у Жаҳон чемпионатларидаги голли ҳаракатлари бўйича Германия терма жамоаси собиқ ҳужумчиси Мирослав Клозенинг 16 та натижадан иборат рекордини (21) янгилади. Бироқ 18 июль куни Франция ҳужумчиси Килиан Мбаппе Мессининг ушбу натижасидан (22) ўзиб кетди. 

“Абадий” юлдуз ўз тенгдошлари томонидан олқишланди

Месси билан 2022 йил Қатарда бўлиб ўтган Жаҳон чемпионатида бирга ўйнаган Анхель Ди Мария энди мухлислар Аргентина осмонининг кўк-оқ рангли либосида афсонавий ҳужумчини кўра олмаслигини англаш жуда оғир эканини таъкидлади.

“Мен фақат сен билан бир даврда туғилганимни, сени кўриш, ўйинингдан завқ олиш ва энг муҳими, терма жамоада сен билан шунча йилларни бирга ўтказиш бахтига муяссар бўлганимни биламан”, дейди Ди Мария.

Мессининг “Интер Майами”даги аргентиналик жамоадоши Родриго Де Пауль саккиз карра “Олтин тўп” соҳиби бўлган футболчининг ўз мамлакатига бўлган “сўзсиз муҳаббати”ни алоҳида таъкидлади.

“Шунчаки раҳмат. Барча даврларнинг энг буюк футболчиси, бизга шунча бахт бахш этганинг учун раҳмат. Одамларни қанчалик кўп бор табассум қилдирганингни ҳатто тасаввур ҳам қила олмайсан! Сен абадийсан”,  деб ёзди Де Пауль.

Аргентина терма жамоаси ярим ҳимоячиси Энцо Фернандес эса кейинги машғулотлар ва ўйинларни Мессисиз тасаввур қилиш қийинлигини айтди. Унинг сўзларига кўра, Мессини кўп йиллар давомида миллий жамоанинг 10-рақамли либосида кўриш одатий ҳолга айланиб қолган.

“Майдонга чиқиб, сени 10-рақамда кўрмасликни тасаввур қилиш жуда қийин. Сени у ерда шунча йиллар давомида кўриб келдимки, бу манзарасиз терма жамоани тасаввур қилишнинг ўзи мушкул”, дейди Фернандес.

Ҳужумчи Лаутаро Мартинес эса 2005 йилда миллий жамоада дебют қилган Мессининг Аргентина футболи учун қилган хизматлари олдида сўзлар ожиз эканини таъкидлади.

“Майдонда эришган барча ютуқларингдан ташқари, менга ўргатган нарсаларингни ҳамиша эслайман: ҳеч қачон таслим бўлмаслик, ҳар бир муваффақиятсизликдан кейин ҳам олдинга интилиш, жимгина меҳнат қилиш ва энг муҳими, ҳар доим ўзимизга ишониш. Биз сенни жуда соғинамиз, капитан. Бу сафарни сен билан бирга босиб ўтганимиз учун абадий миннатдор бўлиб қоламиз. Ҳаммаси учун раҳмат, капитан!” дейди Мартинес.
 

Мессига билдирилган эҳтиром ва миннатдорлик сўзлари фақат унинг терма жамоадаги собиқ ва амалдаги жамоадошлари билан чекланиб қолмади. Аргентина Президенти Хавьер Милей Мессини “ажойиб инсон” деб атади. Мамлакат футбол ассоциацияси президенти Клаудио Тапия эса уни “орзуларимиз сардори” дея таърифлади.

“Ўша бола, “Ла Пульга” (Мессининг лақаби), кўпинча имконсиздек туюлган нарсаларни амалга оширган ўша бетакрор футболчи... Сен аллақачон бу юртнинг, миллий терма жамоамизнинг ва жаҳон футболининг афсонасига айланиб улгурдинг.
Сен бизни сеҳрга ишонишга мажбур қилдинг. Балки шунинг учун ҳам вақт сен учун ҳам тўхтамаслигини қабул қилиш қийин. Аргентина терма жамоаси либоси сенинг рамзинг бўлиб қолади. Халқимизнинг сенга бўлган муҳаббати эса абадий давом этади”, дейди Тапия.

FIFA президенти Жанни Инфантино ҳам Мессини ёрқин халқаро фаолияти билан табриклади. У аргентиналик футболчи миллионлаб мухлисларга улкан қувонч бахш этганини таъкидлади.

“Сен Жаҳон чемпионати ғолиби ва спортимиз тарихидаги энг буюк футболчилардан бири сифатида халқаро фаолиятингни якунлаяпсан. Сенга фаолиятингнинг кейинги босқичида энг яхши тилакларимни билдираман”, дейди Инфантино.

Мессининг рафиқаси Антонелла Рокуццо ҳам турмуш ўртоғига самимий сўзлар билан мурожаат қилди.

“Бу сафарда ёнингизда бўлиш ва барча орзуларингиз рўёбга чиққанини кўриш мен учун қандай шараф эканини сўз билан ифодалаш қийин. Сиз бу ҳикояга ва ундан ҳам кўпроғига муносиб эдингиз. Биз сизни чексиз севамиз”, деб ёзди Антонелла Рокуццо.

Футбол мухлислари ва бутун футбол жамоатчилиги учун қанчалик оғир бўлмасин, Лионель Месси ўзининг буюк футболчилик фаолияти якунига тобора яқинлашмоқда. Аргентина терма жамоаси билан хайрлашуви эса бу жараёндаги биринчи ва энг оғриқли қадам бўлди. Балки бу қарор унинг миллионлаб мухлисларига ҳақиқатни босқичма-босқич қабул қилишга имкон бериш, хайрлашув оғриғини бироз енгиллаштириш учун ташланган қадамдир.

Месси ҳали “Интер Майами” сафида майдонга тушиши, голлар уриши ва мухлислар олқиши остида ўйнашда давом этиши мумкин. Аммо унинг футболчилик фаолияти финиш чизиғига жуда яқин келганини унинг ўзи ҳам, уни йиллар давомида кузатиб келган мухлислари ҳам яхши англаб турибди. Энди асосий савол – бу буюк карьеранинг расмий якуни қачон эълон қилинишида.

Эҳтимол, Месси мавсум якунига қадар ўйнашда давом этар, балки хайрлашув санаси йил охирига тўғри келар. Бу ҳозирча номаълум. Аммо бир нарса аниқ: буюк сафарнинг сўнгги боби бошланди. Аргентина терма жамоаси билан хайрлашув – Мессининг футболдан кетиши эмас, балки ўша буюк кунга ташланган биринчи қадамдир.