Британиялик спортчи руҳий саломатлик учун 1 700 км югурди

Британиялик спортчи Ник Коутс Албаниядан йўлга чиқиб, 37 кун ичида қарийб 1 700 километр масофани босиб ўтди ва Туркиянинг Ургюп туманига етиб борди. Бу ҳақда “Anadolu” хабар берди.

Қайд этилишича, Коутс сентябрь ойининг биринчи ҳафтасида Албаниядан югуришни бошлаган. У Греция орқали Туркияга етиб борган. Спортчи Ургюп шаҳрида ҳафта охирида ўтказиладиган “Salomon Kapadokia Ultra Trail” мусобақасида қатнашиш учун ҳам борган.

Коутс Ургюп шаҳридаги Республика майдонида шаҳар ҳокими Али Эртуғрул Бул, мусобақа ташкилотчиси Айдин Айхан Гюней ҳамда “Salomon” компаниясининг Туркиядаги вакиллари томонидан кутиб олинган.

Британиялик спортчи сафар давомида ҳам жисмоний, ҳам руҳий жиҳатдан қийин вазиятларга дуч келганини айтган. Унинг сўзларига кўра, у ҳар куни ўртача 45-50 километр югурган. Айниқса, сўнгги кун оғир кечган.

“Охирги 20 километрда кучим тугаётганини ҳис қилдим. Бир девор устига ўтириб, энди давом эта олмаслигимни ўйладим. Бирор нарса еб, сув ичдим ва бироз дам олдим. Кейин яна йўлга тушдим ва ниҳоят мақсадимга етдим”, дейди Коутс.

У сафар давомида оиласи ва дўстларидан катта ёрдам олганини, шунингдек, Туркия, Греция ва Албанияда ўзи танимайдиган инсонлар ҳам унга кўмаклашганини билдирган. Ижтимоий тармоқлардаги табрик ва қўллаб-қувватлаш хабарлари ҳам спортчини таъсирлантирган.

Маълумот учун, Ник Коутс шанба куни “Salomon Kapadokia Ultra Trail” мусобақасининг 119 километрлик масофасида иштирок этади. Унинг Албаниядан Туркиягача бўлган югуриши “Unbound – Sessizliği Kır” (“Сукутни буз”) шиори остида руҳий саломатлик муаммоларига эътибор қаратиш ва ўз жонига қасд қилишнинг олдини олиш мақсадида ташкил этилган.

Эслатиб ўтамиз, аввалроқ 34 ёшли ирландиялик Эймон Кивни Истанбулдан Ирландиягача оёқ кийимсиз 6 805,83 километр йўл босиб, энг узоқ ялангоёқ саёҳат бўйича жаҳон рекордини ўрнатгани ҳақида хабар берди.