Британиялик актёр Рассел Брэнд 10,5 йилга қамалди

Британиялик актёр Рассел Брэнд зўрлаш ва жинсий тегажоғлик учун 10,5 йилга озодликдан маҳрум этилди. Бу ҳақда “Guardian” хабар берди. 

Қайд этилишича, қироллик судьяси Жоэл Беннатан зўрлаш ва жинсий тегажоғликда айбланаётган 51 ёшли британ актёри Рассел Брэндга нисбатан ҳукмни эълон қилган. Иш тафсилотларини баён этар экан, судья Брэнд аёлларга нисбатан содир этилган жинсий тегажоғликларда айбланганини эслатиб ўтган.

Шундай қилиб, тергов маълумотларига кўра, актёр Лондон пабларидан бирида аёлга ҳужум қилган ва унинг кўкрагини ушлаган. Бошқа бир ҳолатда эса актёр радиостанцияга бориб, бошқа одамларнинг кўз олдида станция ходимасига ошкора тегинган ва ўпган.

Судья тўртта жиноятдан учтаси жамоат жойларида – барда, радиостанцияда ва реклама суратга олинаётган жойда, бошқаларнинг кўз олдида содир этилганини таъкидлаган.

“Ушбу эпизодлар сизнинг машҳурлик сизга ҳалол одамлар яшайдиган қоидалар билан чекланмаган ҳолда, исталган жойда ва хоҳлаганча ўзингизни тутиш ҳуқуқини беради, деган ишончингизни намойиш этади”, дейди судья Беннатан.

Тергов маълумотларига кўра, 2009 йилда Брэнд 21 ёшли мухлисасини зўрлаган. Ҳукмни ўқиб эшиттирар экан, судья Беннатан Брэндни бир неча бор “жинсий йиртқич” деб атаган. Брэнд зўрлаш эпизоди ва жинсий тегажоғликнинг учта ҳолати бўйича айбдор деб топилган. Умумий жазо муддати 10,5 йилни ташкил этади.

Судьянинг сўзларига кўра, Рассел Брэнд муддатидан илгари шартли озод қилинишга даъвогарлик қилишидан олдин 10,5 йиллик қамоқ жазосининг учдан икки қисмини ўташи керак. Бу актёр қамоқда камида етти йил ўтиришини англатади.

Маълумот учун, 2025 йилнинг апрель ойида полиция Рассел Брэндга 1999 йилдан 2005 йилгача бўлган даврда тўрт нафар аёлга нисбатан зўрлаш ва жинсий хусусиятга эга зўравонлик ҳаракатлари бўйича айблов эълон қилгани маълум бўлган. Полициянинг Брэндга эътиборини “Times” ва “Sunday Times” газеталари ҳамда “Channel 4” телеканали томонидан 2023 йилда биргаликда ўтказилган суриштирув жалб қилган.