Болалар “орзуси”: Конгода мактаб ёниб кетди. Ўнлаб ўқувчилар кулга айланди

Конго Республикасининг исёнчилар назоратидаги Букаву шаҳрида содир бўлган ёнғин оқибатида камида 24 нафар мактаб ўқувчиси ҳалок бўлди, яна 29 киши жароҳатланди. Бу ҳақда Руанда томонидан қўллаб-қувватланадиган AFC/M23 ҳаракати томонидан тузилган маъмуриятдаги Жанубий Киву провинцияси вице-губернатори Дуния Масумбуко Бвенге маълум қилди.

Қайд этилишича, Жанубий Киву провинциясидаги Букаву шаҳрида юз берган ёнғин икки мактабни вайрон қилган ва 300 га яқин ёғоч уйни йўқ қилган. Ҳалок бўлганлар орасида 19 нафар қиз ва 5 нафар ўғил бола бор.

AFC/M23 ҳаракати баёнотида дастлабки маълумотларга кўра, ёнғин оқибатида 24 киши ҳалок бўлгани ва воқеа сабаблари ҳамда ҳолатларини аниқлаш бўйича тергов бошлангани айтилган. Ҳаракат маълумотига кўра, 29 киши тиббий ёрдам олмоқда, уларнинг 21 нафари реанимация бўлимида.

Бвенгенинг сўзларига кўра, ёнғинда 29 киши жароҳатланган. Воқеа сабабларини аниқлаш бўйича текширув давом этмоқда.

Гувоҳлардан бирининг хабар беришича, ёнғин тушдан кейин ўчирилган, аммо вайроналар ва буришиб кетган тунука бўлаклари орасидан ҳали ҳам оқ тутун кўтарилиб турган.

“Биз хиёбонда эдик, болалар эндигина мактабга борган эди. Ёнғин мактабдан узоқ бўлмаган жойда бошланди”, деган воқеа гувоҳи Пьер Мудахама.

Унинг айтишича, тез ёрдам машиналари воқеа жойига етиб келиб, ҳалок бўлганлар ва жароҳатланганларни олиб кетган.

Аҳоли ва тиббиёт ходимлари қурбонлар сони яна ортиши мумкинлигини айтган. Воқеа жойида бўлган бир киши 17 нафар марҳумнинг жасадини, жумладан болалар ва катталарнинг таналарини тез ёрдам машинасига юклашга ёрдам берганини маълум қилган.

Маҳаллий тиббий марказ ёнғинда ҳалок бўлган 10 кишининг жасади олиб келинганини айтган. Бошқа бир шифохона эса 50 нафардан ортиқ ўқувчи қабул қилингани, улардан 14 нафари вафот этганини билдирган.

Маълумот учун, AFC/M23 ҳаракати ўтган йил бошида Конго Демократик Республикасининг шарқий қисмида тезкор ҳужум уюштириб, Букаву шаҳрини эгаллаган.

Эслатиб ўтамиз, аввалроқ Конго Демократик Республикасида никоҳ тўйи фожиа билан якунланганди. Тўйда юз берган ёнғин оқибатида 20 дан ортиқ киши ҳалок бўлганди.