“Барселона” ПСЖ устидан UEFA’га шикоят қилди

“Барселона” клуби Чемпионлар лигасининг учинчи тури доирасида “Пари Сен-Жермен”га қарши ўйин олдидан парижлик мухлислар томонидан намойиш этилган провокацион баннер юзасидан UEFA’га расмий шикоят билан мурожаат қилди. Бу ҳақда “La Vanguardia” нашри хабар берди.

Жорий йилнинг 20 октябрь куни Париждаги “Парк де Пренс” стадионида бўлиб ўтган баҳсда мезбонлар каталонияликларни 4:2 ҳисобида мағлуб этганди.

Учрашув бошланишидан олдин ПСЖ мухлислари трибуналардан бирида улкан баннерни очган. Унда ПСЖ футболкасини кийган, юзи ниқоб билан тўсилган эркак арра ёрдамида “Барселона” эмблемасини кесаётгани тасвирланган. Баннерда француз тилида “Massacre à la parisienne” – “Парижча услубдаги қирғин” деган ёзув ҳам бўлган.

“Reuters”нинг ёзишича, баннер дизайнида 1974 йилда суратга олинган машҳур Америка даҳшатли фильми “Техасдаги аррали қотиллик”дан илҳомланган. “Барселона” вакили нашрга клуб учрашувдан сўнг UEFA вакилига баннер мазмуни ҳамда трибуналардан янграган ҳақоратли қўшиқлар ҳақида расман маълумот берганини тасдиқлаган.

Испаниянинг “Cadena SER” радиостанцияси хабар беришича, каталонияликлар ушбу тасвирларни қабул қилиб бўлмайдиган деб ҳисобламоқда. Клуб вакилларининг фикрича, баннер спортда зўравонлик ва нафратни тарғиб қилиши мумкин. Шунингдек, “Барселона”га қарши қаратилган бошқа ҳақоратомуз баннерлар ҳам норозиликка сабаб бўлган.

Франциянинг “L’Équipe” нашри маълумотларига кўра, ПСЖ раҳбарияти мухлислар тайёрлаган ушбу намойишни олдиндан маъқуллаган.

UEFA интизомий регламентининг 16.2(e)-моддасига мувофиқ, спорт тадбири хусусиятига мос келмайдиган провокацион хабарларни имо-ишоралар, сўзлар, буюмлар ёки бошқа воситалар орқали намойиш этиш интизомий жазога сабаб бўлиши мумкин. Бундай қоидабузарлик учун стандарт жарима 10 минг еврони ташкил этади. Бироқ якуний қарорни UEFA’нинг интизомий органлари қабул қилади.

Эслатиб ўтамиз, аввалроқ Қозоғистон футбол федерацияси салбий мазмундаги ва Ўзбекистон байроғи акс этган баннер билан боғлиқ можародан кейин “Ақтобе” ва “Ордабаси” клубларига нисбатан жарима чорасини қўллаганди.