Асосий масала Украинанинг мустақиллигини сақлаб қолиш – Йенс Столтенберг 

Украина учун НАТОнинг эшиклари очиқ қолмоқда. Бироқ айни дамдаги асосий масала Украинанинг мустақиллигини сақлаб қолишдир. Бу ҳақда ташкилот Бош котиби Йенс Столтенберг “Süddeutsche Zeitung” газетасига берган интервьюсида айтиб ўтган. 

Столтенбергнинг сўзларига кўра, Украинанинг НАТОга аъзолиги кейинроқ муҳокама қилинади.

“НАТО эшиклари очиқлигича қолмоқда. Биз буни ўтган йилларда Черногория, Шимолий Македония, Финляндия ва Швециянинг блокка қўшилишига рухсат бериш орқали исботладик. Аъзолик тўғрисида фақат Украина ва 30 та аъзо давлат қарор қилиши керак. Бошқа ҳеч ким бунга аралашмайди. Украинада қуролли можаро бўляпти. Ҳамма тушуниши керакки, НАТОнинг устувор вазифаси қўллаб-қувватлаш ва ёрдам беришдир. Асосий вазифа Украинани мустақил давлат сифатида сақлаб қолиш. НАТОга аъзолик масаласи кейинроқ муҳокама қилинади”, дейди НАТО Бош котиби.

Россия Украинага уруш бошлаганидан бери НАТО давлатлари тўғридан-тўғри ҳарбий можароларда иштирок этмаслигини айтиб келади. Йенс Столтенберг ҳам яна бир марта Украинада НАТОнинг қўшинлари йўқлигини айтди.

“Украинада НАТО қўшинлари йўқ. Бироқ биз Украинага ўзини ҳимоя қилишга ёрдам бермоқдамиз. Бу бизни уруш иштирокчисига айлантирмайди. Биз бу урушга тортилмаймиз”, дейди у.

Йенс Столтенбергнинг хулоса қилишича, ҳеч нарса қилмасдан бир четда қараб туриш эркинлик ва демократиянинг мағлубиятига олиб келади.