Арманистоннинг жанговар позициялари йўқ қилинди – Баку (видео)

Озарбайжон аксилтеррор чоралари доирасида Арманистоннинг жанговар позициялари ва ҳарбий объектларини йўқ қилди. Бу ҳақда Озарбайжон Мудофаа вазирлиги хабар берди. 

“Арманистон Қуролли кучларининг Хўжайли вилояти ва Қизил бозор йўналишидаги жанговар позициялари, узоқ муддатли ўқ отиш пунктлари, жанговар техникаси ва ҳарбий объектлари Озарбайжон армияси бўлинмалари томонидан йўқ қилинди”, дейилади вазирлик хабарида.

Айни вақтда, Хонкендида ноқонуний арман қуролли гуруҳларига тегишли “Тор” зенит-ракета мажмуаси ҳам йўқ қилингани айтилмоқда.

Бундан ташқари, аксилтеррор чоралари натижасида Қорабоғдаги “сепаратистик режим”нинг ноқонуний қуролли тузилмаларига қарашли “Мортира” электрон уруш станциясига зарба берилган.

Эслатиб ўтамиз, олдинроқ Озарбайжон Мудофаа вазирлиги Қорабоғда “Озарбайжон Республикасининг конституциявий тузумини тиклаш мақсадида” маҳаллий аксилтеррор чоралари бошланганини эълон қилганди. Баку тинч аҳоли ва фуқаролик инфратузилмаси нишон эмаслигини таъкидлаганди. Кейинчалик Озарбайжон Мудофаа вазирлиги хавфли ҳудуддан аҳолини эвакуация қилиш учун гуманитар йўлаклар ва қабул пунктлари яратилганини билдирган. Воқеалар фонида Арманистон Бош вазири Никол Пашинян Хавфсизлик кенгаши йиғилишини ўтказиб, (тан олинмаган) Тоғли Қорабоғдаги вазиятни муҳокама қилган. Арманистон ТИВ эса Озарбайжонни (тан олинмаган) Тоғли Қорабоғ аҳолисига қарши “кенг кўламли тажовуз”ни бошлаганликда айблаган.