Арманистоннинг собиқ президенти қўлга олинди (видео)

Бугун, 25 август куни эрталаб ҳуқуқ-тартибот идоралари ходимлари мамлакатнинг собиқ президенти Роберт Кочарянни қўлга олиб, Коррупцияга қарши курашиш қўмитасига олиб борди ҳамда унинг уйида, шунингдек, мухолиф “Арманистон” блоги депутати бўлган ўғли Левон Кочаряннинг хонадонида тинтув ўтказди. Бу ҳақда “News am” хабар берди.

Тергов ҳаракатлари яна бир неча ўнлаб манзилларда бўлиб ўтмоқда. Идора зарур ҳолларда қўшимча маълумотларни ошкор қилишга ваъда берган. Собиқ президент идораси юз бераётган воқеаларни “ҳокимиятнинг президент Кочарян ва унинг оиласига навбатдаги ҳужуми” деб атаган.

Бир кун аввал Левон Кочарян ва Бош вазир Никол Пашинян парламентда бир-бирларини айблаган. Кичик Кочарян ҳукумат раҳбарини “Арцахни ҳалок қилган ва минглаб одамларнинг ўлимига сабаб бўлган пасткаш ва хоин” деб атаган. Пашинян эса жавобан Кочарянлар оиласи ниманинг ҳисобидан миллионер бўлганини сўраган ва унинг аъзоларини жавобгарликка тортишга ваъда берган.

Жорий йилнинг 24 август куни кечқурун Арманистоннинг “Ишханутюн” нашри аноним манбаларга таяниб, даҳанаки жангдан сўнг Пашинян ҳуқуқ-тартибот идораларига Роберт Кочарян ва унинг ўғилларига қарши ҳаракатларни бошлашни топширгани ҳақида ёзган. Кейинги куни эрталаб тинтувлар бошланган. Тергов ҳаракатлари парламентдаги можаронинг бевосита оқибати бўлгани ҳақида далиллар мавжуд эмас.

Шунингдек, жорий йилнинг 17 июнь куни Арманистон Марказий сайлов комиссияси Кочарянни жиноий жавобгарликка тортишга розилик берган. Унинг адвокати Арам Орбеляннинг сўзларига кўра, собиқ президентга мансаб ваколатларини суиистеъмол қилиш ва пул ювиш айблови қўйилиши режалаштирилган. Тергов ишни 2004 йилда “Мастер-класс” теннис клуби ер майдони билан боғлиқ битимга боғлаган: 2008 йилда собиқ президентнинг ўғли Седрак Кочарян ушбу битимда иштирок этган компаниянинг улушини сотиб олган.

Коррупцияга қарши курашиш қўмитаси 25 августдаги тинтувлар айнан ушбу иш билан боғлиқми-йўқми, ҳозирча аниқлик киритмаган. Кочарян Арманистонни 1998 йилдан 2008 йилгача бошқарган, ҳозирда эса “Арманистон” мухолиф блогига раҳбарлик қилади. 7 июндаги парламент сайловларида блок 12 та мандат олган.

Сайловдан бироз олдин Пашинян собиқ президент ҳибсга олиниши кераклигини айтган.

“Сайловдан сўнг Роберт Кочарян ҳибсга олиниши ва 1 мартдаги жинояти учун суд олдида жавоб бериши керак. 1 март воқеаларида айбдор бўлганлар узоқ йилларни қамоқда ўтказишлари керак”, деган у.

Гап Пашинян ҳокимиятга келишига сабаб бўлган 2018 йилги “Бархaт инқилоби”дан сўнг Кочарянга қарши қўзғатилган иш ҳақида бормоқда. 2008 йил 1 март куни оммавий норозилик намойишлари вақтида куч ишлатар тузилмалар билан тўқнашувларда 10 нафар намойишчи ҳалок бўлган. Кочарян бир муддат ҳибсда ўтирган, аммо судланмаган. 2021 йил апрель ойида Арманистон Конституциявий суди Кочарянга қўйилган конституциявий тузумни ағдариш ҳақидаги моддани Асосий қонунга зид деб топган.

Эслатиб ўтамиз, аввалроқ Перунинг собиқ президенти Ольянта Ҳумала Конституциявий суд унинг пул ювиш бўйича 15 йиллик қамоқ жазосини бекор қилганидан кейин қамоқдан озод этилганди.