Алишер Усмонов “Kapitalbank”даги улушини кўпайтирди

Асли келиб чиқиши ўзбек бўлган россиялик миллиардер Алишер Усмоновнинг USM ҳолдинг компанияси шуъба корхонаси — “Телекоминвест” МЧЖ “Kapitalbank”даги улушини 3,85 фоизга кўпайтирди. Бу ҳақда “Тошкент” Республика фонд биржаси маълум қилди.

Кеча, 8 февраль кунги биржа савдоларида Россия компанияси “Kapitalbank”нинг 16 493 327 дона акциясини ёки устав капиталининг 3,85 фоизини сотиб олди. 

Шу тариқа Алишер Усмоновнинг “Kapitalbank”даги улуши 61,54 фоизга ёки 263 893 229 донага етди.

Маълумот учун, “Телекоминвест” 2021 йилнинг ноябрь ойи охирида банк акциядорлари рўйхатига кириб, 215 млрд сўмга қўшимча 65,9 млн дона қимматли қоғозларни сотиб олди. Шундан сўнг Усмонов компанияси банкнинг 16,6 фоиз акциясига эгалик қилган.

Бу келишувдан кейин, 2021 йилнинг октябрь ойидан бери “Kapitalbank”нинг 112,49 млн дона акциясига эгалик қилиб келаётган Ойбек Турсуновнинг акциялари 41,6 фоизга тушди.

Усмонов компанияси жорий йилнинг январь ойида ҳам “Kapitalbank”даги улушини кўпайтирганди. 10 январь кунги биржа савдоларида Россия компанияси “Kapitalbank”нинг 32,98 млн дона акциясини ёки устав капиталининг 8,33 фоизини сотиб олди.

Шундан сўнг, 20 январда Ойбек Турсунов “Kapitalbank”нинг афилланган шахслари рўйхатидан чиқди. Бунга унинг банк акцияларидаги улуши 20 фоиздан камроқни ташкил қилгани сабаб бўлган бўлиши мумкин.