Алишер Усмоновнинг ЕИга қарши даъвоси блокланиши ноқонуний деб топилди

Германия Федерал Олий суди Гамбург Ер суди раисининг россиялик тадбиркор Алишер Усмоновнинг ЕИ Кенгашига қарши даъвоси бўйича суд ҳужжатларини топширишдан бош тортганини ноқонуний деб топди. Бу ҳақда “Welt” хабар берди.

Қайд этилишича, Усмоновнинг манфаатларини ҳимоя қилаётган адвокат Йоахим Николаус Штайнҳёфель РБКга Федерал Олий суди раисида бундай рад этиш ваколати йўқлигини тан олганини тасдиқлаган.

Унинг сўзларига кўра, суд, шунингдек, Федерал адлия идорасининг Германия ТИВ билан келишилган тавсияси “мажбурий характерда эмас” деб қарор қилган. 2026 йил 21 октябрда Федерал Олий суд рад этишнинг ўзини ҳам, аввалроқ уни қўллаб-қувватлаган Ганзея Олий Ер судининг қарорини ҳам бекор қилган.

“Бир неча йил давомида суд раиси ўз судининг судьясига қарши бўлиб, ижро ҳокимияти томонида туриб келди. Қонун унга бундай ваколатларни бермаган эди. Эндиликда Германия Федерал Олий суди бунга тўғридан тўғри кўрсатиб ўтди ва унинг қарорини, шунингдек, уни ўз кучида қолдирган Ганзея Олий Ер судининг ажримини бекор қилди. Суд раиси ТИВ кўрсатмаларига бўйсунмайди. Суд ва ижро ҳокимиятини бир-бирига аралаштирган киши суд ҳокимиятининг мустақиллигига путур етказади”, дейилади Штайнҳёфель баёнотида.

Аввалроқ, Гамбург Ер суди кейинчалик ЕИ Кенгаши томонидан Усмоновга қарши санкцияларни асослаш учун ишлатилган баъзи таърифларни тарқатишни тақиқлаган. Усмоновнинг ҳимояси уларнинг расмий сайтда кейинчалик ҳам тилга олинишини унинг шахсий номулкий ҳуқуқларини бузиш деб баҳолаган ва ЕИ Кенгашига қарши ушбу маълумотларни тарқатишни тақиқлаш ҳақида даъво аризаси берган.

Эслатиб ўтамиз, аввалроқ Европа Иттифоқи россиялик миллиардерлар Алишер Усмонов ва Михаил Фридманни санкциялар рўйхатидан чиқаришга келишгани ҳақида хабар берилган эди.