Аксарият федерациялар қарши чиқса, янги лойиҳа ташкил этилмайди – FIFA

Халқаро футбол федерацияси (FIFA) халқаро федерацияларнинг аксарияти ташаббусни қўллаб-қувватламаса, FIFA янги тижорий лойиҳа ташкил этилмаслигини маълум қилди. Бу ҳақда FIFA матбуот хизмати хабар берди.

“Агар халқаро ассоциацияларнинг кўпчилиги қўллаб-қувватламаса, FIFA’нинг тижорат фаолияти ўзгаришсиз қолади. Янги лойиҳа таклифи 3 та асосий тамойилга таянади: футбол ривожи учун мисли кўрилмаган молиялаштириш имкониятларини яратиш, спортимизнинг тижорат салоҳиятига ҳақиқий глобал эгаликни таъминлаш ҳамда барча халқаро ассоциацияларга демократик жараён орқали ўз тақдирини мустақил белгилаш имконини бериш”, дейилади баёнотда.

Аввалроқ, FIFA президенти Жанни Инфантино Жаҳон чемпионати тижорат ҳуқуқларининг бир қисмини хусусий инвесторларга сотишни режалаштираётгани ҳақида хабарлар тарқалган эди. FIFA’нинг ҳисоб-китобларига кўра, ушбу лойиҳа орқали 4,2 миллиард доллар жалб қилиниши мумкин.

Маълумотга кўра, таклифни қўллаб-қувватлаган федерацияларнинг ҳар бирига 35 миллион евро миқдорида субсидия ваъда қилинган. Қарорни тасдиқлаш учун сўнгги муддат жорий йилнинг 19 сентябрь куни этиб белгиланган. Шу муддатдан кейин розилик билдирган федерациялар қўшимча равишда тахминан 9 миллион евро олиши мумкинлиги айтилган.

Бироқ бу ташаббус футбол мутасаддилари, миллий федерациялар ва қатор спорт ташкилотлари томонидан кескин танқид қилинди. Кейинроқ, UEFA ушбу режа бекор қилинмагунча FIFA ҳомийлигидаги барча турнирларни бойкот қилишини эълон қилди. Бу қарор UEFA’нинг барча 55 та аъзо ассоциацияси томонидан қўллаб-қувватланди.