АҚШга миллионлаб одамлар бостириб киришини тўхтатдим – Трамп

АҚШ Президенти Дональд Трамп мамлакатга ноқонуний муҳожирлар оқими тўхтатилганини маълум қилди. Бу ҳақда у кеча, 5 август куни Лас-Вегас шаҳридаги тадбирда сўзлаган нутқида айтди.

Трампнинг айтишича, президентлик фаолиятининг дастлабки 30 кунида АҚШга кирадиган миллионлаб муҳожирлар оқимига чек қўйилган.

“30 кун ичида мамлакатимизга миллионлаб одамлар бостириб киришини тўхтатдим. Тасаввур қилинг, мамлакатимизни эгаллаб олишмоқчи эди. АҚШнинг жанубий чегараси орқали 25 миллион киши кириб келишга интилган”, деган Трамп.

Унинг сўзларига кўра, сўнгги 15 ой давомида АҚШ ҳудудига бирорта ҳам ноқонуний муҳожир кирмаган. Оқ уй раҳбари маъмурияти “муҳожирлар жиноятчилиги балоси”га барҳам бериш устида иш олиб бораётганини ҳам таъкидлаган.

Трамп, шунингдек, ўтган ҳафта Испанияда юз берган воқеаларни мисол келтириб, “60 мингдан ортиқ муҳожир чегарага бостириб келиб, шаҳарлардан бирини эгаллагани, тинч аҳолига ҳужум қилиб, талон-торож қилгани”ни айтган.

“Коммунистлар Америка учун худди шундай ҳолатни хоҳлайди”, деган у.

Шу билан бирга, Трамп АҚШ Иммиграция ва божхона назорати хизмати (ICE) ходимларининг ноқонуний муҳожирларни қўлга олиш ва депортация қилиш бўйича ҳаракатларини қўллаб-қувватлашини билдирган.

“Биз ҳар доим ҳуқуқни муҳофаза қилувчи органларимизни қўллаб-қувватлаймиз”, деган АҚШ Президенти.

Эслатиб ўтамиз, аввалроқ АҚШ Олий суди Президент Дональд Трамп маъмуриятининг Гаити ва Суриядан келган минглаб муҳожирларни ҳуқуқий ҳимоядан маҳрум этиш тўғрисидаги илтимосини қўллаб-қувватлаганди.