АҚШ хорижликларга сиёсий бошпана беришни тўлиқ тўхтатмоқчи

АҚШ Олий суди Президент Дональд Трамп маъмуриятининг Гаити ва Суриядан келган минглаб муҳожирларни ҳуқуқий ҳимоядан маҳрум этиш тўғрисидаги илтимосини қўллаб-қувватлади. Бу ҳақда NBC News хабар берди.

Маълум қилинишича, 25 июнь куни Олий суд 6 та қарши 3 овоз билан Трамп маъмурияти фойдасига қарор чиқарган. Бу қарор тахминан 350 минг нафар гаитилик ва 6 минг нафар сурияликнинг вақтинчалик ҳимоя мақомини бекор қилиш режасини давом эттиришга имкон беради. Оқибатда ушбу шахслар депортация қилиниши мумкин.

Телеканалнинг таъкидлашича, мазкур қарор Трамп маъмуриятининг бошқа давлатлар фуқаролари учун ҳам шунга ўхшаш ҳимоя чораларини бекор қилиш ҳаракатларини жадаллаштириши мумкин.
ТАСС’нинг хабар беришича, суд қарори ортидан Оқ уй аппарати раҳбари ўринбосари Стивен Миллер АҚШ амалда сиёсий бошпана сўраб мурожаат қилувчи хорижликларни қабул қилишни деярли тўхтатаётганини билдирган.

“Шу тариқа, Америка эшиклари сиёсий бошпана изловчилар учун тўлиқ ёпилади. Биз шундай келишувларга эришдикки, агар сиз сиёсий бошпана сўрасангиз, сизни қабул қиладиган бошқа бир давлатни топамиз. Бу жуда оддий, жуда самарали ва тўлиқ ечим”, деган Миллер.

Эслатиб ўтамиз, аввалроқ Вашингтон федерал суди АҚШ Президенти Дональд Трамп маъмурияти томонидан 2025 йил ноябрида Миллий гвардия ҳарбий хизматчиларига қилинган ҳужумдан сўнг жорий этилган иммиграция чекловларини бекор қилганди.