264 нафар шахс Ўзбекистон фуқаролигига қабул қилинди

Ўзбекистон Республикаси мустақиллигининг 35 йиллиги арафасида 264 нафар шахс Ўзбекистон Республикаси фуқаролигига қабул қилинди. Бу ҳақда “Ахборот” дастурида хабар берилди.

Қайд этилишича, фуқаролик олганлар орасида Ўзбекистонда йиллар давомида яшаб, меҳнат қилиб, оила қурган, бироқ фуқаролиги бўлмагани сабабли айрим ҳуқуқ ва имкониятлардан тўлиқ фойдалана олмаган шахслар ҳам бор.

Маълумотларга кўра, сўнгги йилларда қарийб 26 минг нафар шахс Ўзбекистон фуқаролигига қабул қилинган. Фуқароликни тан олиш институти жорий этилгач эса 60 мингдан ортиқ шахс Ўзбекистон фуқароси деб тан олинган.

Президент фармони билан фуқароликка қабул қилинган 264 нафар шахснинг 90 нафари Сурхондарё, 47 нафари Тошкент вилояти, 39 нафари Қорақалпоғистон Республикаси, 38 нафари Сирдарё ва 15 нафари Самарқанд вилоятида истиқомат қилади. Бухоро вилоятида эса сўнгги 10 йил давомида 1 501 нафар шахс Ўзбекистон фуқаролигига қабул қилинган.

Суҳбатларда фуқаролиги бўлмаган шахслар йиллар давомида сайловларда қатнаша олмагани, давлат ишларига кира олмагани ёки чет элга чиқишда қийинчиликларга дуч келганини айтган. Айримлари эса яқин қариндошларининг вафоти ёки тўй-маросимларига ҳужжатлари сабаб бора олмаганини таъкидлаган.

Эндиликда улар Ўзбекистон фуқароси сифатида қонунда белгиланган ҳуқуқлардан тўлақонли фойдаланиш, сайловларда иштирок этиш ҳамда давлат билан ҳуқуқий муносабатларини мустаҳкамлаш имкониятига эга бўлади.

Мазкур ташаббус мамлакатда инсон ҳуқуқ ва манфаатларини таъминлаш, фуқаролиги бўлмаган шахсларнинг ҳуқуқий мақомини белгилаш ҳамда жамиятда тенг имкониятларни кенгайтиришга қаратилган сиёсатнинг навбатдаги амалий натижаси бўлган.

Эслатиб ўтамиз, аввалроқ Ўзбекистон Республикаси Мустақиллигининг 35 йиллиги муносабати билан мамлакат Президенти Шавкат Мирзиёев анъанага кўра, Жазони ижро этиш муассасаларида жазо муддатини ўтаётган, қилмишига чин кўнгилдан пушаймон бўлиб, тузалиш йўлига ўтган бир гуруҳ шахсларни афв этиш тўғрисидаги фармонни имзолагани ҳақида хабар берилган эди.