2026 йилнинг энг зўр давлатлари эълон қилинди

“Best Countries 2026” рейтинги эълон қилинди ва Марказий Осиё мамлакатларидан унга фақат Қозоғистон ва Ўзбекистон киритилди – улар мос равишда 75- ва 77-ўринларни эгаллади. Бу ҳақда “Best countries index” ҳисоботида келтирилган.

“Best Countries 2026” рейтинги WPP BAV (бу дунёдаги энг йирик реклама ва коммуникация холдинги бўлмиш WPP компаниясининг брендинг ва бренд капиталини баҳолашга ихтисослашган тадқиқот бўлими) томонидан Пенсильвания университетининг Уортон бизнес мактаби билан ҳамкорликда тайёрланган.

“Best Countries” – бу турмуш даражаси ёки иқтисодиёт аҳволининг тўғридан тўғри рейтинги эмас. Унинг якуний позициялари кўп жиҳатдан давлатларнинг халқаро сўровнома иштирокчилари томонидан қандай қабул қилинишини акс эттиради.

2026 йилги тадқиқотда 33 та мамлакатдан 15 131 киши иштирок этган. Улар давлатларни 73 та хусусият бўйича баҳолаган ва ушбу мезонлар ўнта йўналишга – ҳаёт сифати ва тадбиркорликдан тортиб, маданий таъсир, мерос ва давлат қудратигача бўлган соҳаларда бирлаштирилган.

“Best Countries 2026” рейтингида биринчи ўринни Швейцария эгаллаган. Кейинги ўринлардан Япония, Швеция, Канада, Австралия, Германия, Нидерландия, Буюк Британия, Норвегия ва БАА жой олган.

Марказий Осиё мамлакатларидан рейтингга Қозоғистон ва Ўзбекистон киритилган. Қозоғистон 85 та ўриндан 75-поғонани эгаллаган. Ҳаёт сифати, тадбиркорлик ва тарихий-маданий мерос бўйича у 82-ўринда, маданий таъсир бўйича эса 85-ўринда қайд этилган. Мамлакатнинг нисбатан кучли томонлари қаторида ишлаб чиқаришнинг арзонлиги (17-ўрин), бошқа давлатлардан ажралиб туриши (18-ўрин) ва кучли қуролли кучларини (19-ўрин) кўрсатиб ўтилган.

Ўзбекистон 77-ўринни эгаллаган. Мамлакатнинг энг кучли кўрсаткичлари орасида – бошқа мамлакатлардан ажралиб туриши (ушбу кўрсаткич бўйича 13-ўрин) ва ишлаб чиқаришнинг арзонлиги (16-ўрин) бор. Ўзбекистон энг паст баҳоларни капиталга эга бўлиш ва кучли халқаро иттифоқларнинг мавжудлиги учун олган – ҳар иккала кўрсаткич бўйича ҳам 85-ўрин.

Эслатиб ўтамиз, аввалроқ Ўзбекистон жорий йилда ёлғиз саёҳат қилиш учун дунёдаги энг яхши давлатлар рейтингида 5-ўринни эгаллаган эди.