2026 йилги Жаҳон чемпионатининг финали ҳаками фаолиятини якунлади

2026 йилги Жаҳон чемпионати финал учрашувининг бош ҳаками, словениялик Славко Винчич профессионал ҳакамлик фаолиятини якунлади. Бу ҳақда Словения футбол ассоциацияси матбуот хизмати маълум қилди.

2026 йилги Жаҳон чемпионати финалида Испания терма жамоаси қўшимча вақтда Аргентинани 1:0 ҳисобида мағлуб этган эди. Ушбу учрашувни бошқарган Винчич иккинчи бўлим охирида аргентиналик Энсо Фернандесга иккинчи сариқ карточка кўрсатиб, уни майдондан четлатган.

Шунингдек, қўшимча вақтда VAR тавсиясидан сўнг Микел Мерино киритган гол бекор қилинган. Бунга испаниялик футболчининг ҳужум давомида Аргентина ҳимоячиси Николас Отамендига нисбатан қоидабузарлик қилгани сабаб бўлган. Винчич 2026 йилги Жаҳон чемпионатида жами 4 та учрашувни бошқарган.

46 ёшли ҳакам 2010 йилдан буён FIFA тоифасидаги халқаро ҳакам сифатида фаолият юритиб келган.

У 2022 йил Европа лигаси финалида ҳам ҳакамлик қилган. Ўша баҳсда Германиянинг “Айнтрахт” клуби Шотландиянинг “Рейнжерс” жамоасини асосий ва қўшимча вақтдаги 1:1 ҳисобидан сўнг, пенальтилар сериясида 5:4 ҳисобида мағлуб этган.

2024 йилда эса Винчич Чемпионлар лигаси финалини бошқарган. Ўша учрашувда “Реал Мадрид” “Боруссия Дортмунд”ни 2:0 ҳисобида мағлуб этиб, ўз тарихидаги 15-чемпионлик кубогини қўлга киритганди.