“11 сентябрь сценарийси”. Исроил Flydubai самолётидаги ҳолат бўйича версияни эълон қилди

Исроил махсус хизматлари БААдан Исроилга учаётган Flydubai самолётининг иккинчи учувчиси лайнерни Тель-Авивдаги осмонўпар бинога йўналтириш учун бошқарувни эгаллаб олишга уринган деб ҳисобламоқда. Бу ҳақда “The Telegraph” нашрига учта хабардор манба маълум қилди.

“Бу 11 сентябрга ўхшаш сценарий деб ҳисобланмоқда, унда иккинчи учувчи учувчини ўлдиради ва самолётни аксарияти исроилликлардан иборат бўлган барча йўловчилар билан бирга Исроил ҳудудида қулатади”, дейди манбалардан бири.

Самолёт 30 сентябрь эрталаб иккинчи учувчининг капитанга ҳужум қилиши ортидан Саудия Арабистонида фавқулодда қўнишни амалга оширди. Ҳодиса давомида иккинчи учувчи ҳамкасбига чўнтак пичоғи билан бир неча бор зарба берган, шундан сўнг лайнер кескин пастга шўнғиган. 37 сония ичида самолёт тахминан 4,6 минг метр баландликни йўқотган ва одатда самолётни олиб қочишда ишлатиладиган “ноқонуний аралашув” сигналини юборган.

Янив Хаюн исмли йўловчининг “The Telegraph” нашрига айтишича, ҳодиса вақтида у кабинага бостириб кириб, самолётни бошқараётган иккинчи учувчини кўрган. 

“Мен террорчини ушлаб олдим, унга нисбатан бўғиш усулини қўлладим ва энг аввало уни ташқарига судраб чиқардим”, дейди у. 

Шундан сўнг, Хаюн бир муддат самолёт бошқарувини ўз қўлига олган. Кейинчалик штурвални бортда бўлган бошқа икки нафар учувчи эгаллаб, лайнерни Саудиянинг Табук шаҳрига қўндирган.

Исроил Бош вазири Биньямин Нетаньяху “самолётни бортдаги барча одамлар билан бирга қулатиш” мақсад қилинган бўлиши мумкинлиги текширилаётганини маълум қилган. Шу билан бирга, у содир бўлган воқеани тўғридан тўғри теракт деб аташдан тийилган. Исроил Мудофаа вазири Исраэль Кац эса ҳодисани “жиҳодга уриниш” деб атаган.

Самолёт қўнганидан сўнг Саудия Арабистони ҳукумати иккинчи учувчини ҳибсга олган. У, тахминларга кўра, Уммон фуқароси ҳисобланади. Унинг шахси ва ҳаракатининг сабаблари ҳали расман тасдиқлангани йўқ.

Flydubai авиакомпанияси юз берган ҳодиса сабаблари ўрганилаётганини билдирган ва “барвақт хулоса чиқармасликка” чақирган.

Биньямин Нетаньяхунинг “Fox News”га берган интервьюсида айтишича, Flydubai самолёти бортидаги терактнинг олдини олишга ёрдам берган Исроил фуқароси сантехник бўлиб ишлайди. 

Эслатиб ўтамиз, кеча, 30 сентябрь куни Flydubai авиакомпаниясининг Дубайдан Тель-Авивга FZ1073 рейси бўйича учаётган Boeing 737 MAX 8 йўловчи самолёти ёрдам сўраб самолётни эгаллаб олишга уриниш сигналини узатганидан сўнг, эрталаб Саудия Арабистонининг Табук шаҳридаги аэропортга фавқулодда қўнишни амалга оширган эди.

Бортда 174 киши, жумладан 27 нафар бола бўлган. Баъзи йўловчиларнинг сўзларига кўра, аввалига учувчилар кабинасидан бақир-чақир эшитилган, кейин кабина эшиги очилиб кетган, улар бир учувчининг жароҳатланганини ва кийими қонга беланганини кўришган. Унга биринчи ёрдам кўрсатилган, йўловчилардан бири шифокор бўлиб чиққан. Экипаж аъзолари ва рейс йўловчиларига ҳужумчини зарарсизлантириш ҳам муваффақ бўлган.

Саудия Арабистонига қўнишни бортда йўловчи сифатида кетаётган бошқа икки нафар учувчи амалга оширган. CNN аниқлик киритишича, самолётни кейинги рейсда учиши керак бўлган икки нафар “захирадаги учувчи” қўндирган. Исроил Бош вазири Биньямин Нетаньяху Саудия Арабистони ҳукумати ҳамкасбини пичоқ билан жароҳатлаган учувчини ҳибсга олганини маълум қилган. Пичоқдан жароҳат олган учувчи экипаж капитани – Ҳиндистон фуқароси Смит Маччхар бўлиб чиқди. 

“Оғир жароҳатларга қарамай, у қаршилик кўрсатди, учувчилар кабинаси эшигини очди ҳамда йўловчилар ва экипажга ҳужумчини зарарсизлантиришга имкон бериб, ҳаводаги фалокатнинг олдини олди”, деб ёзди X тармоғида Биньямин Нетаньяху.