Ҳозирда дунё бўйлаб авж олаётган урушлар сони айтилди 

Бугун дунёда 60 дан ортиқ қуролли можаро давом этмоқда, бу Иккинчи жаҳон уруши тугаганидан бери кузатилмаган даражадир. Бу ҳақда Бирлашган Миллатлар Ташкилоти хабар берди.

Қайд этилишича, БМТнинг инсон ҳуқуқлари бўйича Олий комиссари Фолькер Тюрк Женевадаги Инсон ҳуқуқлари кенгашида сўзга чиқиб, қуролли можаролар сони ортиб бораётгани ва халқаро ҳуқуқнинг заифлашаётганидан жиддий хавотир билдирган.

У, шунингдек, сунъий интеллектдан ҳарбий мақсадларда, айниқса инсон аралашувисиз одам ҳаётига қасд қилиш тўғрисида қарор қабул қила оладиган қуролларни ишлаб чиқишда фойдаланилаётганига эътибор қаратган.

Тюрк сунъий интеллект устидан назоратни кучайтириш бўйича чақириқларни қўллаб-қувватлаган. Унинг таъкидлашича, бу инқилобий технология назоратсиз қолдирилса, “инсоният учун экзистенциал таҳдид”га айланиши мумкин.

Олий комиссар сунъий интеллект тизимлари келажакда шу қадар кучайиб кетиши мумкинки, уларни ишлаб чиққан мутахассислар ҳам назорат қила олмай қолиши эҳтимолидан огоҳлантирган.

“Синов муҳитидан ташқарига чиқиб кетадиган ёки ишлаб чиқувчиларни ўзини ўчиришга йўл қўймаслик учун шантаж қиладиган сунъий интеллект – ҳаддан ташқари кучли СИдир”, деган Тюрк.

У мамлакатларни сунъий интеллект технологиялари жойлашган ҳудудлар ҳамда ушбу технологиялар таъминот занжирларида иштирок этаётган давлатлар билан биргаликда янги технологиянинг тарқалишига аниқ чегаралар белгилашга чақирган.

Тюрк, шунингдек, сунъий интеллект хавфсизлиги ва ҳимоясини таъминлайдиган қатъий кафолатларни кеч бўлмасидан олдин ишлаб чиқиш зарурлигини таъкидлаган.

Эслатиб ўтамиз, аввалроқ БМТ Инсон ҳуқуқлари бўйича глобал альянс тузаётгани хабар қилинганди.