Ҳамроев олтин медални қандай қайтариб олганини айтди

Апелляциясидан кейин олтин медали қайтарилган ўзбекистонлик параатлет Фахриддин Ҳамроев қонунни билмаганлиги сабабли рақиби уни устидан шикоят қилганини ва шу сабабли ҳам олтин медалини қайтариб олганини айтди.

Фахриддин Ҳамроев Айчи-Нагояда ўтказилаётган мусобақада Т13 классида 1500 метрга югуриш баҳсида барча рақибларини ортда қолдириб, маррага биринчи бўлиб етиб борган ва олтин медални қўлга киритган.

Бироқ мусобақадан кейин иорданиялик спортчи ҳакамларга шикоят билан мурожаат қилган. У Ҳамроев ўзини итариб юборгани ва югуришига халақит берганини даъво қилган. Шикоят қаноатлантирилгач, ўзбекистонлик атлетнинг натижаси бекор қилиниб, у дисквалификация қилинган.

“Тасаввур қилинг, маррага биринчи етиб келяпсиз ва олтинсиз қоляпсиз. Финиш чизиғига 150 метр қолганда иорданиялик рақибимдан ўтиб кетдим. Мен биринчи, у иккинчи кирди ва шундай шикоят қилди, устимдан апелляция бериб, яъни ўтиб кетганимда уни мен уриб, йўлини тўсиб кетган эканман. Қонунни билмаганлиги сабабли, бизнинг мутахассисларимиз, делегациямиздан келган раҳбарларимиз кириб, қайта апелляция бериб, қонунни кўрсатиб, исботлаб беришди ва уни хатолигини ўзига айтиб, мени олтин медалимни қайтариб берди ва мен муҳим бўлган 30-олтин медални Ўзбекистонга тақдим этганимдан хурсандман. Бу борада ҳаммамизни қўллаб-қувватлаб турган делегациямиз, қўллаб-қувватлашга келган бошқа раҳбариятларга, ҳаммасига раҳмат айтамиз”, дейди Ҳамроев.

Ўзбекистон делегациясининг масъул вакиллари апелляция шикоятини бергандан сўнг Халқаро параатлетика назорат комиссияси мусобақа видеоёзувини қайта кўриб чиққан. Текширув натижаларига кўра, Ҳамроев рақибига нисбатан қоидабузарлик содир этмаган, деб топилган ва олтин медаль қайтарилган.