Birinchi xonimlar Imom Buxoriy majmuasini ziyorat qildi

“Bolalar farovonligiga investitsiya” sammitining madaniy dasturi doirasida O‘zbekiston Respublikasi Birinchi xonimi Ziroat Mirziyoyeva sammitda ishtirok etayotgan birinchi xonimlar va yuqori martabali mehmonlar bilan birgalikda Imom Buxoriy yodgorlik majmuasiga tashrif buyurdi. Bu haqda Ziroat Mirziyoyevaning Telegram-kanalida xabar berildi.

Imom Buxoriy yodgorlik majmuasiga Ziroat Mirziyoyeva bilan birgalikda Turkiya Prezidentining rafiqasi Emina Erdo‘g‘an hamda uning qizi Esra Erdo‘g‘an Albayrak, Qirg‘iziston Prezidentining rafiqasi Oygul Japarova va Livan Prezidentining rafiqasi Nimet Aun ham borgan.

Turkiya birinchi xonimi Emina Erdo‘g‘an o‘zining Instagram ijtimoiy tarmog‘idagi sahifasida ushbu ziyorat haqida yozib qoldirdi.

“Samarqandda biz Imom Buxoriy yodgorlik majmuasida ma’naviy sayohatga otlandik. Biz o‘z hayotini hadis ilmiga bag‘ishlagan buyuk alloma xotirasini avaylab-asrab kelayotgan ushbu ajoyib maskanning tarixiy va madaniy ahamiyatiga bevosita guvoh bo‘ldik”, deydi Emina Erdo‘g‘an.

Shuningdek, Turkiyaning birinchi xonimi Islom sivilizatsiyasini bebaho asarlari bilan boyitgan hamda ta’limoti asrlar davomida insoniyatga ezgulik yo‘lini ko‘rsatib kelayotgan Imom Buxoriyni chuqur ehtirom bilan yod etishini va Allohdan u kishini o‘z rahmatiga olishini so‘rab duo qilishini yozgan. 

Eslatib o‘tamiz, avvalroq “Bolalar farovonligiga investitsiyalar: kelajak avlodlar uchun barqaror va adolatli taraqqiyot yo‘lida” xalqaro sammiti doirasida Samarqandda “IMKON” markazining ochilish marosimi bo‘lib o‘tgandi edi. Unda O‘zbekiston Respublikasi Birinchi xonimi Ziroat Mirziyoyeva, shuningdek, sammitda ishtirok etayotgan birinchi xonimlar va yuqori martabali mehmonlar qatnashdi.