Zidan Messi, Neymar va Mbappega ustozlik qilishi mumkin

Fransiyaning “Pari Sen-Jermen” klubi rahbariyati Zinedin Zidanni jamoa bosh murabbiyi lavozimiga taklif qilish variantini ko‘rib chiqmoqda. Fransiyalik mutaxassis 2021 yilning yanvarida jamoani qabul qilib olgan argentinalik mutaxassis Maurisio Pochettino o‘rnini egallashi mumkin.

Ma’lumot uchun, Zidan ilk bor murabbiy faoliyatini 2015-2016 yilgi mavsumda “Real”ga ustozlikdan boshlagan. Fransiyalik mutaxassis jamoa bilan ketma-ket uch marta UEFA Chempionlar ligasi, Yevropa superkubogi (2), Ispaniya chempionati (2), Superkubogi va klublar o‘rtasidagi Jahon chempionatida zafar quchgan.

Eslatib o‘tamiz, Zidan “Real” bosh murabbiyi lavozimini 2021 yil may oyida tark etishga qaror qilgan edi. Ayni paytda “Qirollik klubi”ning sobiq murabbiyi ishsiz va bir nechta jamoalar taklifini ko‘rib chiqmoqda.

Avvalroq, Zidan Fransiya terma jamoasi bosh murabbiyligiga tayinlanishi kutilayotgan edi. Biroq mamlakat futbol federatsiyasi Dide Deshamga ishonch bildirishda davom etmoqda.