JSST iftorlikda nima yeyish foydali ekanini ma’lum qildi 

Iftorlik paytida sog‘lom va me’yorida ovqatlanib, quvvatni to‘ldirib olish muhim. Ro‘zani uchta xurmo yoki suv bilan ochish iftorlikni boshlashning an’anaviy va sog‘lom yo‘lidir. Bu haqda Jahon sog‘liqni saqlash tashkiloti tomonidan Ramazon oyida sog‘lom ovqatlanish bo‘yicha e’lon qilingan tavsiyalarda aytilgan.  

Ta’kidlanishicha, xurmo odam tanasidagi ko‘plab a’zolarning to‘g‘ri faoliyat ko‘rsatishini ta’minlaydigan kletchatkaga boy ozuqa. 

AQSHdagi Cornell University mutaxassislarining yozishicha, ovqatlanishdan oldin suv ichish tanani suyuqlik bilan oziqlantirishning eng yaxshi yo‘lidir. 

“Lekin ro‘zani ochiboq birdaniga ko‘p suv ichib yubormaslik lozim. Bu salomatlik uchun xavfli hisoblangan suv intoksikatsiyasiga olib kelishi mumkin”, deyilgan xabarda. 

Qayd etilishicha, organizmni muhim vitaminlar va ozuqa moddalari bilan ta’minlash uchun iftorlik taomnomasiga ko‘plab sabzavotlarni qo‘shgan afzal. Shuningdek, organizmni quvvat va kletchatka bilan ta’minlaydigan donli (yanchilmagan va tozalanmagan) mahsulotlarni iste’mol qilish maqsadga muvofiq. 

Pechda yoki grillda pishirilgan yog‘siz go‘sht, terisiz tovuq va baliq tanovul qilish orqali organizmni sog‘lom oqsillar bilan boyitish mumkinligi ham aytilgan. 

“Umuman olganda, yog‘ va shakarga boy, qovurilgan hamda qayta ishlangan mahsulotlardan tiyilish kerak. Iftorlikdan so‘ng ko‘p shirinlik yeyish tavsiya etilmaydi. Buning o‘rniga, suvga boy mavsumiy mevalar, jumladan, olma iste’mol qilish foydali”, deyilgan xabarda. 

Iftorlik uchun JSST tavsiyalari: 

• uyda pishirilgan sabzavotli sho‘rva; 

• sabzavot va ko‘katlardan tayyorlangan salat; 

• qiyma qo‘shilgan sabzavotli taomlar (qovoq, baqlajon, tok bargiga o‘ralgan do‘lma); 

• pechda pishirilgan tovuq. 

Qayd etilishicha, ko‘p miqdorda suv ichish, ta’mni yaxshilash uchun taomga limon bo‘laklari va yalpiz qo‘shish mumkin.