Jizzaxda cho‘pon ikki sherigini pichoqlab o‘ldirdi

Jizzax viloyatining Forish tumanida cho‘pon ikki sherigini pichoqlab o‘ldirdi. Bu haqda viloyat prokuraturasi ma’lum qildi.

Ma’lumotlarga ko‘ra, joriy yilning 13 aprel kuni Forish tumanidagi “Egizbuloq” MFY hududidagi fermer xo‘jaliklarining biriga qarashli cho‘pon uyida vaqtincha yashab, cho‘ponlik qilib kelayotgan, 1977 yilda tug‘ilgan M.G‘. ushbu hududda cho‘ponlik qilib kelayotgan tanishi 1977 yilda Paxtakor tumanida tug‘ilgan J.X. va 1973 yilda shu tumanda tug‘ilgan X.X. bilan spirtli ichimlik iste’mol qilgan. Shu vaqtda ularning o‘rtasida janjal kelib chiqqan va M.G‘. mast holatida yonida bo‘lgan oshxona pichog‘i bilan J.X. va X.X.ning ko‘krak qafasiga bir necha marta tan jarohati yetkazib, ularni qasddan o‘ldirib, voqea joyidan yashiringan.

Mazkur holat yuzasidan viloyat prokuraturasi tomonidan Jinoyat kodeksining 97-moddasi bilan jinoyat ishi qo‘zg‘atilib, dastlabki tergov harakatlari olib borilmoqda.