JCH finalini AQSHda 62,8 mln odam tomosha qildi

2026 yilgi Jahon chempionati finalini AQSHda 62,8 million tomoshabin kuzatdi. Bu mamlakatda futbol translyatsiyalari bo‘yicha yangi rekord bo‘ldi. Bu haqda “Axios” nashri xabar berdi.

Ma’lum qilinishicha, “Fox Sports” telekanalidagi translyatsiyani qariyb 39 million kishi tomosha qilgan. Bu ko‘rsatkich 2022 yilgi Jahon chempionati finaliga nisbatan 132 foizga ko‘p.

Uchrashuvni yana 24 millionga yaqin tomoshabin ispan tilida efirga uzatgan Telemundo telekanali orqali kuzatgan. Bu esa Qatarda o‘tkazilgan Jahon chempionati finaliga nisbatan 50 foizdan ziyod o‘sishni anglatadi.

Nashr ta’kidlashicha, rekord darajadagi auditoriya AQSHda futbolga bo‘lgan qiziqish tobora ortib borayotganini ko‘rsatadi. Shuningdek, bu kelgusida yirik futbol musobaqalarining translyatsiya huquqlari narxi oshishiga ham olib kelishi mumkin.

Taqqoslash uchun, 2006 yil Germaniyada bo‘lib o‘tgan Italiya va Fransiya o‘rtasidagi Jahon chempionati finalini 17 million amerikalik tomosha qilgan edi. Bu 2026 yilgi mundial finali auditoriyasidan qariyb uch baravar kam.

Jahon chempionati 11 iyundan 19 iyulga qadar AQSH, Kanada va Meksikada bo‘lib o‘tdi. Turnirda ilk bor 48 ta terma jamoa ishtirok etdi. Musobaqa yakunida Ispaniya terma jamoasi chempionlikni qo‘lga kiritdi.