Janubiy Afrikada portlash yuz berdi (video)

Janubiy Afrikaning Yoxannesburg shahri markazida portlash yuz berdi. Bu haqda Janubiy Afrikaning “SABC News” telekanali shahar favqulodda xizmatiga tayanib xabar berdi.

“Yoxannesburg favqulodda xizmatlari portlashni tasdiqladi”, deyiladi xabarda.

Politsiya ma’lumotlariga ko‘ra, portlash shaharning markaziy biznes mavzesida, Bri va Simmons ko‘chalari oralig‘ida sodir bo‘lgan. Qayd etilishicha, ushbu hududda magistral gaz quvurining bir qismi portlagan.

Hodisa oqibatida kamida to‘qqiz kishi jabrlangan, halok bo‘lganlar haqida xabar berilmagan.

Rasmiylar fuqarolarni portlash joyidan uzoqroq turishga va boshqa yo‘llardan foydalanishga chaqirgan. Manbada aytilishicha, voqea joyiga qutqaruvchilar yetib kelgan. 

Yoxannesburg joylashgan Gauteng provinsiyasi bosh vaziri Panyaza Lesufi shahardagi vaziyat nazorat ostida ekanini aytgan.

Eslatib o‘tamiz, avvalroq Turkiyaning Anqara viloyatida joylashgan mashinasozlik va kimyo zavodida portlash sodir bo‘lgandi.