Jahon banki Pokistonga 1,69 milliard AQSH dollari ajratmoqchi

Jahon banki Pokistonning sel toshqinidan eng ko‘p aziyat chekkan Sind viloyatida beshta loyihani moliyalashtirish uchun 1,69 milliard AQSH dollari ajratmoqchi. Bu haqda “Geonews” nashri xabar berdi.

“Sind 2022 yilgi toshqinlardan eng ko‘p talofot ko‘rgan viloyat edi. Uzluksiz toshqinlar oqibatida viloyatda uy-joy, sog‘liqni saqlash va qishloq xo‘jaligi sohalariga katta zarar yetkazildi va odamlar tirikchiligini yo‘qotdi. Zarar ko‘rgan uylar va infratuzilmani tiklash, rekonstruksiya qilishdan tashqari, toshqinlarga qarshi kurashda ishtirok etishimiz zarur", deydi Jahon bankining Pokiston bo‘yicha direktori Naji Benxassin.

Qayd etilishicha, rejalashtirilgan beshta loyihadan uchtasi asosan reabilitatsiya va uy-joylarni rekonstruksiya qilishni, qolgan ikkita loyiha onalar va bolalar uchun sog‘liqni saqlash xizmatlarini qo‘llab-quvvatlaydi. 

Bundan tashqari, loyihadan 885 000 dan ortiq xonadon (taxminan 4,4 million kishi) foyda ko‘rishi kutilmoqda. Xususan, suv toshqinlariga javob sifatida loyiha 800 000 suv toshqinlaridan zarar ko‘rgan fermer xo‘jaliklariga urug‘lar, o‘g‘itlar sotib olishga imkon berish orqali ekinlarni qayta tiklashga yordam berish uchun naqd pul o‘tkazmalarini taqdim etadi.

Eslatib o‘tamiz, Pokistonda joriy yilning iyun oyida sodir bo‘lgan musson yomg‘irlari oqibatida kuzatilayotgan toshqinlar qurbonlari soni 1700 kishiga yetgani hamda eng ko‘p odam janubdagi Sind viloyatida 759 kishi halok bo‘lgani haqida xabar berilgan edi.

Avvalroq Vashington Islomobodga “Tahrik-i Tolibon Pokiston” (Pokiston Tolibon harakati, TTP) radikal guruhi jangarilari tomonidan kelayotgan tahdidlarga qarshi kurashda yordam berishga tayyorligi ma’lum qilingan edi.

Ozoda Choriyeva