Zelenskiyga noyob chex to‘pponchasi sovg‘a qilindi. Bu nimani anglatadi?

Chexiya Prezidenti Petr Pavel Ukraina yetakchisi Vladimir Zelenskiyga avtomatik zaryadlanadigan SZ 75 to‘pponchasini sovg‘a qildi. Bu haqda Chexiya rahbari Twitter'da ma’lum qildi.

“Bizning qurollarimiz Ukrainaga boshidanoq kurashda yordam berdi. Ularning qahramonligiga hurmat belgisi sifatida men Zelenskiyga seriya raqami 22 bo‘lgan afsonaviy SZ 75 to‘pponchasini sovg‘a qildim”, deydi siyosatchi.

Prezident Pavelning ta’kidlashicha, u o‘zining ukrainalik mavqedoshiga mamlakat oldidagi xizmatlari, mudofaa va xavfsizlikni ta’minlashga qo‘shgan hissasi hamda millatning xalqaro obro‘sini oshirgani uchun Chexiya Respublikasining oliy mukofoti – “Oq sher” ordenining 100 yilligiga bag‘ishlangan maxsus seriyadagi noyob to‘pponchani sovg‘a qilgan.

Uning so‘zlariga ko‘ra, bu to‘pponcha Zelenskiyning Ukraina boshida turgan jasoratini aks ettiradi.

Ma’lumot uchun, davlat rahbarlariga qurol sovg‘a qilish qadimiy odatga ko‘ra, sovg‘a olgan shaxsga g‘alaba tilashni anglatadi.