Zelenskiy Tramp bilan uchrashuv oldidan yevropaliklar bilan gaplashib oldi (video)

Ukraina Prezidenti Vladimir Zelenskiy bugun, 18 avgust kuni Oq uyda AQSH Prezidenti Donald Tramp bilan uchrashuvdan oldin Ukrainaning Vashingtondagi elchixonasida Yevropa yetakchilari bilan uchrashdi. Bu haqda u o‘zining X'dagi sahifasida ma’lum qildi. 

Zelenskiy bu uchrashuvdan maqsad uning mamlakati va butun Yevropa uchun “ishonchli va mustahkam tinchlik” ekanini aytdi. U  AQSH, Yevropa va boshqalar Rossiya Prezidentiga bosim o‘tkazishi kerakligini va hech kim Vladimir Putindan ixtiyoriy ravishda agressiya va yangi bosib olish urinishlaridan voz kechishini kutmasligini aytdi.

Zelenskiyning qo‘shimcha qilishicha, u va yevropalik ittifoqchilar Tramp bilan uchrashuv oldidan o‘z pozitsiyalarini muvofiqlashtirgan.

“Finlyandiya, Buyuk Britaniya, Italiya rahbarlari, Yevropa komissiyasi va NATO Bosh kotibi bilan birgalikda Prezident Tramp bilan uchrashuv oldidan pozitsiyalarimizni muvofiqlashtirdik. Ukraina haqiqiy sulhga va yangi xavfsizlik arxitekturasini o‘rnatishga tayyor. Bizga tinchlik kerak”, dedi Zelenskiy.