Zelenskiy dunyo yetakchilarini Erondagi mavjud hokimiyatni ag‘darishga chaqirdi

Ukraina Prezidenti Vladimir Zelenskiy Erondagi ommaviy norozilik namoyishlariga munosabat bildirib, jahon yetakchilarini fursatni qo‘ldan boy bermaslikka va eronliklarga mamlakatda hokimiyatni o‘zgartirishda ko‘maklashishga chaqirdi.  

“Hozirgi kunda Eronda sodir bo‘layotgan voqealar – keng ko‘lamli noroziliklar, aslida qo‘zg‘olon – Rossiya uchun vaziyat yengillashtirmasligining aniq belgisidir. Bu sayyoradagi har bir vijdonli inson Eron xalqi nihoyat Ukraina va boshqa mamlakatlarga shuncha zarar yetkazgan amaldagi tuzumdan ozod bo‘lishini chin qalbdan istaydi”, deydi Zelenskiy.

Ukraina Prezidentining fikricha, o‘zgarishlar mumkin bo‘lgan fursatni boy bermaslik kerak. Erondagi hokimiyat ag‘darilishi va xalqqa yordam berilishi kerak. 

“Dunyo o‘zgarishlar imkoni bor bo‘lgan bu paytni qo‘ldan chiqarmasligi juda muhim. Har bir rahbar, har bir davlat va xalqaro tashkilotlar hoziroq aralashib, xalqqa, afsuski, bugungi Eronga aylantirib qo‘ygan aybdorlarni chetlatishda ko‘maklashishlari lozim”, deya yozdi Zelenskiy.

Eronda norozilik namoyishlari

Eronda norozilik namoyishlari 2025 yil 28 dekabrda Tehrondagi tarixiy “Grand-bazar” bozorida boshlanib ketdi. Do‘kon egalari milliy valyutaning xorijiy valyutalarga nisbatan keskin qadrsizlanishi va iqtisodiy qiyinchiliklar kuchayishi sababli norozilik bildira boshladi. Namoyishlar tez orada mamlakatning ko‘plab shaharlariga tarqaldi. 

Yarim rasmiy “Tasnim” agentligi ma’lumotlariga ko‘ra, 7 yanvar holatiga ko‘ra, yaralangan politsiyachilar soni 568 kishiga, Basij ko‘ngilli otryadlari vakillari esa 66 kishiga yetgan. Biroq, Eron rasmiylari halok bo‘lganlar haqidagi ma’lumotlarni oshkor qilmagan. 

8 yanvar kuni Tehronda norozilik namoyishlari keskinlashdi. Tartibsizliklar davomida namoyishchilar (jumladan, turli guruhlar) ko‘plab ob’ektlarni – ko‘plab avtobuslar va tez yordam mashinalarini, 24 ta turar-joy binosini, 25 ta masjidni, 2 ta shifoxonani, 26 ta bankni, shuningdek, boshqa davlat va jamoat binolarini yoqib, vayron qilgan. Norozilik namoyishlari kuchayganidan so‘ng Eron hukumati internetga kirish bo‘yicha umummilliy cheklov joriy etdi. 

AQSHda joylashgan Inson huquqlari faollari yangiliklari agentligi (Human Rights Activist News Agency, HRANA) 13 yanvarda xabar berganidek, Eronda iqtisodiy muammolar tufayli boshlangan norozilik namoyishlarida halok bo‘lganlar soni 646 kishiga yetgan. 

Hisobotga ko‘ra, shu davrda Eronning 31 viloyatini qamrab olgan namoyishlarda 505 nafar namoyishchi (ulardan 9 nafari 18 yoshdan kichik), 133 nafar xavfsizlik kuchlari xodimi va 1 nafar prokuror halok bo‘lgan. Bundan tashqari, namoyishlar chog‘ida voqea joyida bo‘lgan 7 kishi jon bergan. Norozilik namoyishlari vaqtida qo‘lga olinganlarning umumiy soni 10 721 kishiga yetgan.