Zelenskiy 2025 yilda urushni diplomatiya bilan yakunlamoqchi

Frontdagi qiyin vaziyatga qaramay, Ukraina urushni 2025 yildan kechiktirmay tugatishga harakat qilmoqchi. Bu haqda mamlakat Prezidenti Vladimir Zelenskiy bugun, 16 noyabr kuni e’lon qilingan Ukraina radiosining 100 yilligi munosabati bilan “Suspilne” telekanaliga bergan intervyusida ma’lum qildi.

“O‘z tarafimizdan urush kelasi yil tugashi uchun hamma narsani qilishimiz kerak. Diplomatik vositalar orqali. Bu juda muhim”, dedi Prezident.

Ukraina rahbari frontning sharqiy sektoridagi vaziyat “haqiqatan ham og‘ir” ekanini tan oldi. Rossiya qo‘shinlari sekin bo‘lsa-da, oldinga siljidi. Zelenskiy rossiyaliklarning frontdagi muvaffaqiyatlarini o‘qitilgan xodimlar va qurollarga ega brigadalarning sekin to‘planishi bilan izohladi.

Unga ko‘ra, Ukraina AQSH va’da qilgan qurollarning yarmini hamon olmagan. Shu bilan birga, Zelenskiy Rossiya qo‘shinlarining jang maydonida og‘ir yo‘qotishlarini hisobga olib, ularning oldinga siljishi sekinlashishini kutmoqda.

“Ularda yo‘qotish kuniga 1,5-2 ming kishi, yarador va halok bo‘lganlar. Ular bunday yo‘qotishlar bilan doimo oldinga siljishlari mumkin emas. Va ba’zi sohalarda taraqqiyot qanday sekinlashgani allaqachon aniq. Endi ularni to‘xtatish uchun biz uzoq kutgan zaxiralar, to‘liq brigadalar keladi”, dedi Zelenskiy.

Eslatib o‘tamiz, kecha, 15 noyabr kuni Germaniya kansleri Olaf Shols va Rossiya Prezidenti Vladimir Putin 2022 yil oxiridan buyon birinchi bor telefon orqali muloqot qilgandi. Suhbatda ular Rossiya-Ukraina urushini muhokama qildi. Zelenskiy esa Shols va Putin suhbatini “Pandora qutisi”ning ochilishi deb atadi va bu Rossiya rahbarini izolyatsiya qilish va Ukrainadagi urushni “adolatli tinchlik” bilan tugatishga qaratilgan sa’y-harakatlarga putur yetkazishini aytdi.