Zelenskiy hamdardlik bildirish uchun Isroilga bormoqchi – OAV 

Ukraina Prezidenti Vladimir Zelenskiy HAMAS guruhi bilan qurolli to‘qnashuvlar fonida birdamlik belgisi sifatida Isroilga tashrif buyurishni rejalashtirmoqda. Bu haqda har ikki davlat rasmiylariga tayanib, “Ynet” xabar berdi.

Zelenskiyning idorasi Isroil Bosh vaziri devoniga tashrifni muvofiqlashtirish bo‘yicha rasmiy so‘rov yuborgan. Hozirda dastlabki muzokaralar davom etyapti, tashrif sanasi hali kelishilmagan.

Qayd etish joizki, kecha, 11 oktyabr kuni NATOning Bryusseldagi shtab-kvartirasiga tashrifi chog‘ida Zelenskiy Isroilning hozirgi holatini Rossiya 2022 yil fevralida boshlagan urush bilan taqqoslagan.

“Yolg‘iz qolmaslik juda muhim edi. Juda muhim", degan Zelenskiy.

U dunyo yetakchilarini Isroilga tashrif buyurishga va uni qo‘llab-quvvatlashga chaqirgan.

“Men institutlar haqida emas, balki teraktlardan jabr ko‘rgan va halok bo‘layotgan odamlarni qo‘llab-quvvatlash haqida gapiryapman”, deya tushuntirgan Ukraina rahbari.

Eslatib o‘tamiz, bugun, 12 oktyabr kuni AQSH Davlat kotibi Entoni Blinkenning Isroilga borishi kutilayotgani haqida xabar bergandik.