Yo‘nalish o‘zgardi: Ronaldu PSJ futbolchisiga aylanishi mumkin

“Manchester Yunayted” hujumchisi Krishtianu Ronaldu PSJ futbolchisiga aylanishi mumkin. Bu haqda “Le 10 Sport” nashri xabar berdi. 

Qayd etilishicha, hujumchi Kilian Mbappe Parij klubini tark etishga yaqin turibdi, shu bois rahbariyat tarkibni kuchaytirish variantlarini qidirmoqda. Manbaning xabariga ko‘ra, agar Ronaldu “Qizil iblislar” safini tark etadigan bo‘lsa, Parij klubi vaziyatdan foydalanishga harakat qiladi.

Avvalroq, Ronaldunin agenti “Barselona” rahbariyatiga futbolchining xizmatlarini taklif qilmoqchi ekani haqida xabarlar tarqalgan edi. 36 yoshli portugaliyalik forvard jamoadagi vaziyatdan va MYU rahbariyatidan norozi. Shu sabab o‘zining agenti Jorje Mendeshga vaziyat o‘zgarmasa, yangi jamoa izlash kerakligini aytgan.

Ronaldu Angliya premer ligasi joriy mavsumida 16 ta o‘yin o‘tkazgan va 8 ta gol urib, 3 ta golli uzatmani amalga oshirgan. 19 uchrashuvda 31 ochko to‘plagan MYU turnir jadvalida yettinchi o‘rinda bormoqda. Ralf Rangnik shogirdlari peshqadam “Manchester Siti”dan 22 ochkoga ortda qolmoqda.