Metrodan foydalanish tartibi belgilandi

Poytaxt metropolitenida yo‘lovchilar qanday harakatlanishi, mazkur hududda nimalarni olib kirish taqiqlanishi joriy yilning 10 oktyabr kuni qabul qilingan Vazirlar Mahkamasining “Metropolitenda yo‘lovchilar hamda boshqa shaxslarning bo‘lishi qoidalari” qarorida ma’lum qilindi. 

Unga ko‘ra, metropoliten infratuzilmasi ob’ektlar va xavfsizlik hududlarida quyidagilar taqiqlanadi:

• yonuvchan, portlovchi moddalardan va bosim ostida ishlovchi qurilmalardan foydalanishni talab etadigan barcha faoliyat turlari bilan shug‘ullanish va shu bilan bog‘liq ko‘ngilochar shoxobchalarni qurish hamda tashkil etish;
• metropoliten inshootlaridan, shu jumladan, yer usti shamollatish qurilmalaridan 25 metrdan kam masofada chiqindilarni to‘plash, yoqish va gulxanlar tashkil etish;
• gaz yoqilg‘isida harakatlanuvchi transport vositalari (avtomatik yong‘in o‘chirish tizimi bilan jihozlangan, estakada inshootlari ostidagi maxsus ochiq avtoturargohlar bundan mustasno) va yonuvchi materiallar ortilgan transport vositalarini estakada inshootlari ostiga (avtoturargohlarga) joylashtirish.

Metropolitenda quyidagilarga ruxsat etilmaydi, jumladan:

• spirtli ichimliklar, giyohvandlik vositalari, psixotrop moddalar va ularning analoglarini iste’mol qilish yoki mast holda kirish;
• qizdiriladigan tamaki, elektron sigaretalar va nosvoy chekish;
• metropoliten hududida oyoq kiyimsiz va kiyimsiz holda bo‘lish;
• bekatga yo‘lovchilarning kiyimi, metropoliten vagonlari, inshootlari va qurilmalarini kir qilishi mumkin bo‘lgan yuklar va buyumlar, shuningdek, velosiped (yig‘iladigandan tashqari), moped, skuter va boshqa harakatlanish vositalari bilan kirish;
• bekat hududida, vagonlarda akrobatik va sport mashqlarini bajarish, har xil turdagi sport to‘plarini o‘ynash.

Qarorda faqatgina yo‘lovchilarning majburiyatlari emas, balki huquqlari ham qayd etilgan. Shu jumladan, metropoliten yo‘lovchilari o‘zlari bilan birgalikda 7 yoshgacha bo‘lgan bolalarini, bolalar va nogironligi bo‘lgan shaxslar aravachalarini, bolalar velosipedlarini, musiqa asboblarini, shuningdek, g‘ilofga solingan holda sanchiluvchi, kesuvchi va oson sinuvchi buyumlar, chana, chang‘i va baliq ovi uchun qarmoqlarni bepul olib yurish huquqiga ega.

Nogironligi bo‘lgan va imkoniyati cheklangan shaxslar uchun metropolitenning texnik vositalaridan (liftlar, nogironligi bo‘lgan shaxslar aravachasini ko‘taruvchi yoki tushiruvchi moslamalar va boshqa jihozlar) foydalanish, zaruratga ko‘ra tegishli xodimlardan yordam olish imkoni mavjud.

Shuningdek, bekatlarni havaskorlik foto va videotasvirga olish ham mumkin.