Yevropaning ayrim davlatlarida Coca-Cola rastalardan olinmoqda

Coca-Cola Yevropaning ayrim mamlakatlarida ichimliklar tarkibida xlorat kimyoviy moddasining yuqori darajada aniqlanishi sababli mahsulotlarini qaytarib oladi. Bu haqda BBC xabar berdi.

Qaytarib olish jarayoni Belgiya, Lyuksemburg va Niderlandiyada amalga oshiriladi. Belgiya bo‘limining xabariga ko‘ra, zarar ko‘rgan mahsulotlar orasida Coke, Fanta, Sprite, Tropico va Minute Maid brendlari mavjud.

“Mustaqil ekspertlarning tahliliga ko‘ra, iste’molchilar uchun bu bilan bog‘liq xavf juda past”, deydi kompaniya vakili.

Kompaniyaga ko‘ra, muammo faqat chet eldan keltirilgan juda kam miqdordagi Appletiser, Coca Cola Original Taste, Coca Cola Zero Sugar, Diet Coke va Sprite Zero mahsulotlariga ta’sir ko‘rsatgan. Ushbu mahsulotlarning ishlab chiqarish kodlari 328 GE dan 338 GE gacha bo‘lib, ular idishning pastki qismida ko‘rsatilgan.

Buyuk Britaniya Oziq-ovqat xavfsizligi agentligi vakili Anne Gravett vaziyat o‘rganilayotganini aytdi.

“Agar xavfli oziq-ovqat mahsulotlari aniqlansa, ular chiqarib tashlanishi va iste’molchilarga xabar berilishi uchun chora ko‘ramiz”, deydi u.

Ma’lumot uchun, xlorat suvni tozalash va oziq-ovqatni qayta ishlashda ishlatiladigan xlor asosidagi dezinfeksiyalash vositalari ishlatilganda hosil bo‘lishi mumkin. Xlorat bolalar va chaqaloqlar orasida qalqonsimon bez bilan bog‘liq sog‘liq muammolariga olib kelishi mumkin.

Buyuk Britaniya Milliy sog‘liqni saqlash xizmati mutaxassisi Karon Grazettning so‘zlariga ko‘ra, xloratni ortiqcha miqdorda iste’mol qilish inson organizmida ko‘ngil aynishi, qusish, diareya va qonning kislorodni singdirish qobiliyatining pasayishi kabi ta’sirlarni keltirib chiqaradi.

Kompaniya vakilining AFP axborot agentligiga ma’lum qilishicha, xloratning yuqori darajasi Belgiyaning Gent shahridagi ishlab chiqarish korxonasida muntazam tekshiruv paytida aniqlangan.

AFP ma’lumotlariga ko‘ra, sotilmagan mahsulotlarning asosiy qismi allaqachon do‘kon rastalaridan chiqarib tashlangan, qolgan mahsulotlar esa chiqarib tashlanish jarayonida.