Yashnoboddagi korxonada yong‘in chiqdi

Bugun, 3 noyabr kuni Toshkent shahar Yashnobod tumanidagi ishlab chiqarish korxonasida yong‘in chiqdi. Bu haqda Favqulodda vaziyatlar vazirligi xabar berdi.

Bildirilishicha, soat 10:40 da Toshkent shahar Yashnobod tumani, Jarqo‘rg‘on 3-berk ko‘chasi 163-uyda joylashgan ishlab chiqarish korxonasida yong‘in bo‘layotganligi to‘g‘risida FVBga xabar tushgan.

Shunga ko‘ra, 8 ta yong‘in-qutqaruv ekipaji hodisa ro‘y bergan hududga soat 10:45 da yetib borgan. Soat 11:24 da yong‘in qurshab olinib, soat 11:54 batamom o‘chirilgan.
 
FVV xabariga ko‘ra, yong‘in oqibatida fuqarolarni kuyish tan-jarohati olish va halok bo‘lish holatlari to‘g‘risida xabar kelib tushmagan. Voqea joyiga shahar va tuman FVB rahbar xodimlari chiqqan.

Eslatib o‘tamiz, o‘tgan oyda Toshkent shahri Mirobod tumanidagi qurilish binosida, Shayxontohur tumanida joylashgan restoranda va shu tumandagi “Ecobozor” majmuasida yong‘in sodir bo‘lgandi.