Yaponiyaning davlat qarzi rekord darajaga yetdi

Yaponiyaning davlat qarzi mamlakat tarixidagi eng yuqori darajaga yetdi va 1300 trillion iyenadan oshdi. Bu haqda mamlakat Moliya vazirligi xabar berdi. 

Ma’lum qilinishicha, 2024 yil oxiriga kelib, davlat qarzi 1317,64 trillion iyenaga (taxminan 8,7 trillion dollar) o‘sgan. Bu o‘tgan yilga nisbatan 31,8 trillionga (205 milliard dollardan ortiq) ko‘p degani.

Yaponiya Moliya vazirligi ma’lumotlariga ko‘ra, mamlakatning davlat qarzi mamlakat yalpi ichki mahsulotidan ikki baravar ko‘proq oshgan. Shu bilan birga, joriy yilda (2024 yil aprelidan 2025 yil martigacha) Yaponiya byudjeti taqchilligi 34,95 trillion iyenani (230 milliard dollar) tashkil etgan. 

“Kyodo” nashrining yozishicha, Yaponiyaning amaldagi hukumati qarzni qisqartirishi dargumon, chunki u davlat byudjetini tasdiqlovchi parlament quyi palatasida ko‘pchilikka ega emas. Qayd etilishicha, hukumat soliqlarni kamaytirish va xarajatlarni, xususan, ta’limga xarajatlarni oshirishni talab qilayotgan muxolifat bosimi ostida. 

Eslatib o‘tamiz, avvalroq AQSH davlat qarzi 36 trillion dollardan oshib, bir yil ichida 2,4 trillion dollarga ko‘paygani haqida xabar berilgandi. So‘nggi ma’lumotlarga ko‘ra, AQSH davlat qarzi 36,2 trillion dollarga yetgan. Bir yil ichida qarz 7 foizga yoki 2,4 trillion dollarga oshgan. So‘nggi besh yil ichida davlat qarzi 23,1 trillion dollardan 1,6 barobar oshgan bo‘lsa, oxirgi o‘n yil ichida ikki barobarga, ya’ni 18,04 trillion dollardan oshgan.