Yaponiyada internet tezligi bo‘yicha rekord o‘rnatildi

Yaponiyada yangi dunyo rekordi o‘rnatildi. Tadqiqotchilar 19 kanalli optik tolali kabel orqali 1 808 kilometr masofaga sekundiga 1 million gigabayt ma’lumot uzatishga muvaffaq bo‘ldi. Bu haqda “Interesting engineering” xabar berdi.

Qayd etilishicha, yaponiyalik tadqiqotchilar guruhi oddiy optik tolalardek yupqa, biroq ichida 19 ta bog‘langan kanali bo‘lgan optik tolani ishlab chiqqan. Bu kanallar bir vaqtning o‘zida parallel tarzda ma’lumot uzatishni ta’minlaydi.

Tadqiqotchilarning aytishicha, ushbu texnologiya sun’iy intellekt va 6G tufayli kelajakda keskin ortadigan ma’lumotlar oqimiga tayyorlanish imkonini beradi.

Ko‘p yillar davomida olimlar optik tolalar orqali uzatiladigan ma’lumot hajmini oshirish ustida ishlashgan. Ilgari ham sekundiga petabitlar uzatishga erishilgan, ammo bu faqat 1 000 kilometrdan qisqa masofalarda mumkin bo‘lgan. Katta masofalarga uzatish esa doimo muammoli bo‘lib kelgan, chunki masofa ortgani sari signal zaiflashadi. Ayniqsa, ko‘p yadroli tolalarda signalni kuchaytirish va ayni vaqtda tashqi aralashuvlarni oldini olish muhim texnik muammo hisoblanadi.

Tadqiqot mualliflari bu muammoni 19 yadroli maxsus optik tolani ishlab chiqish orqali hal qilgan. Uning qalinligi bor-yo‘g‘i 0,125 mm bo‘lib, hozirgi mavjud tolalardan farq qilmaydi. Ular, shuningdek, C va L spektral diapazonlarda ishlovchi aqlli kuchaytirish tizimini ham ishlab chiqqan. Jamoa 19 ta maxsus kuchaytirgichdan foydalangan holda barcha kanallarni uzluksiz ishlatadigan tizimni qurgan. Har bir kanal uchun alohida aylanish konturlari yaratilgan va ulardan signal 21 marotaba o‘tkazilib, umumiy 1 808 km masofa qaytarilgan.

Yo‘l oxirida 19 kanalli qabul qilgich signallarni qamrab olgan va ularni ko‘p kirishli va ko‘p chiqishli signalga (MIMO) asoslangan raqamli protsessor orqali tozalab, aralashuvlarni olib tashlab, uzatish tezligini hisoblab chiqqan.

Yanada hayratlanarlisi tolali tizimning asosiy samaradorlik ko‘rsatkichi bo‘lgan “sig‘im × masofa” ko‘rsatkichi 1,86 eksabit/soniya kilometrni tashkil etgan. Bu hozirgacha qayd etilgan eng yuqori natija. Ushbu hajmdagi tezlik 4K formatidagi 10 mingta filmni yoki GTA V o‘yinining 20 mingta nusxasini atigi bir soniyada yuklab olishga yetadi.

Mazkur tadqiqot shuni ko‘rsatadiki, mavjud infratuzilma o‘lchamini o‘zgartirmasdan, katta masofali yuqori tezlikdagi optik tolali tarmoqlarni barpo etish mumkin. Bu esa ularni keng ko‘lamda joriy etishni sezilarli darajada soddalashtiradi.