Yana bir bank jarimaga tortildi

Reklama qonunchiligi buzilishi yuzasidan “Ipak yo‘li” AITBga nisbatan moliyaviy jarima qo‘llanildi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.

Qayd etilishicha, Qo‘mita tomonidan o‘tkazilgan o‘rganishlar davomida “Ipak Yo‘li” AITB tomonidan e’lon qilingan “Universal” va “Milliy” nomli omonat turlari reklamasida “Universal” omonat turi bo‘yicha yillik foiz stavkasi 22 foiz, “Milliy” omonat turi bo‘yicha yillik foiz stavkasi 25 foiz ekanligi haqida axborotlar berilganligi kuzatilgan.

Shuningdek, bankning rasmiy veb-saytida “Universal” omonat turi bo‘yicha omonatga qo‘yilgan mablag‘lar bo‘yicha yilning dastlabki 6 oyi uchun depozit hisobraqamlari yopilishi muddatiga qarab yillik 14 foiz stavka va yilning keyingi 6 oyi uchun 18 foiz stavka bo‘yicha qayta hisoblab chiqilishi haqida ma’lumot ko‘rsatib o‘tilgan. Ammo yuqorida keltirib o‘tilgan reklama vositalarida  “Universal” nomli omonat turi haqidagi boshqa muhim ma’lumotlar to‘liq berilmaganligi holati aniqlangan.

Yuqoridagilarga ko‘ra, qo‘mita Maxsus komissiyasi “Reklama to‘g‘risida”gi qonunining 16- va 43- moddalari va “Iste’molchilar huquqlarini himoya qilish to‘g‘risida”gi qonunining 6-moddasi talablari buzilish alomatlari yuzasidan “Ipak Yo‘li” AITBga nisbatan ish qo‘zg‘atilib, natijasi yuzasidan belgilangan tartibda  moliyaviy  jarima qo‘llanilgan. Shuningdek, qonunbuzilishi holatini bartaraf etish va kelgusida yo‘l qo‘ymaslik bo‘yicha ko‘rsatma berilgan.

Eslatib o‘tamiz, avvalroq “Orient Finans” XATB Termiz filiali reklama qonunchiligi buzilishi tufayli jarimaga tortilgandi.