WFP ocharchilikka qarshi kurashish uchun 16,9 mlrd dollar ajratmoqchi

Kecha, 22 noyabr kuni Birlashgan Millatlar Tashkilotining Jahon oziq-ovqat dasturi (WFP) 74 mamlakatda 343 million kishiga ta’sir ko‘rsatadigan global oziq-ovqat yetishmovchiligini bartaraf etish uchun 16,9 milliard dollar ajratishga chaqirdi. Bu haqda tashkilot matbuot xizmati xabar berdi.

Jahon oziq-ovqat dasturi o‘z bayonotida ochlik pandemiya sabab bo‘lgan global oziq-ovqat inqirozi davridagi oxirgi marta kuzatilgan darajaga yaqinlashayotgani haqida ogohlantirgan.

WFP 2025 yilgi global istiqbolni e’lon qilib, global oziq-ovqat ehtiyojlari va resurslar o‘rtasidagi xavotirli tafovutni bartaraf etish uchun 16,9 milliard dollar ajratishga chaqirgan.

“Jahon oziq-ovqat dasturining 2025 yil uchun global istiqboli 74 mamlakatda 343 million kishi keskin oziq-ovqat bilan ta’minlanmaganini ko‘rsatadi, bu o‘tgan yilga nisbatan 10 foizga ko‘p”, deyiladi WFP bayonotida.

Hisobotda 1,9 millionga yaqin odam ocharchilik yoqasida ekanligi ta’kidlangan.

“Ayni paytda kechayotgan va bir-biriga zid bo‘lgan mojarolar, iqlimning keskin o‘zgarishi va iqtisodiy zarbalar oqibatida yuzaga kelgan global inqirozlar oqimi ochlikni rekord darajaga olib keldi va gumanitar yordamga doimiy talabni keltirib chiqardi”, deyiladi xabarda.

Biroq, agentlikning ta’kidlashicha, 2024 yilda moliyalashtirishning yetishmasligi uni faoliyatini qisqartirishga majbur qilgan.

G‘azo va Sudanda, shuningdek, Janubiy Sudan, Gaiti va Malining ba’zi qismlarida ocharchilikka duchor bo‘lganlar soni yuqori darajaga yetgan.

“Global gumanitar ehtiyojlar o‘sib bormoqda, bu halokatli mojarolar, tez-tez sodir bo‘layotgan iqlim ofatlari va keng ko‘lamli iqtisodiy tartibsizliklar tufayli kuchaymoqda. Shunga qaramay, moliyalashtirish ham o‘z vaqtida amalga oshirilmayapti”, degan WFP Ijrochi direktori Sindi Makkeyn.

Uning so‘zlariga ko‘ra, 16,9 milliard dollarlik mablag‘ 2025 yilda 123 million nafar eng och odamlarga yordam berishi kerak, bu taxminan ikki hafta ichida dunyoning qahvaga sarflagan mablag‘idir.

Eslatib o‘tamiz, avvalroq 2024 yil uchun xalqaro miqyosdagi ochlik indeksida O‘zbekiston 5 dan past ball bilan 22-o‘rinni egallagani haqida xabar berilgandi. Ushbu 2024 yil uchun e’lon qilingan reytingda 127 ta davlat ishtirok etgan. Unda yakuniy ball qanchalik past bo‘lsa, mamlakatda to‘yib ovqatlanmaydigan fuqarolar soni shunchalik kam bo‘ladi. Tadqiqotga to‘rtta mezon asos qilib olingan bo‘lib, asosan, 5 yoshgacha bo‘lgan bolalarning ozib ketish holatlari, bo‘yi o‘sishdan to‘xtashi, o‘limi va aholining to‘yib ovqatlanmasligi inobatga olinadi.