Vaziyat jiddiy. Shodmonov koronavirusga qarshi choralarni kuchaytirish bo‘yicha yig‘ilish o‘tkazdi

Ayni paytda dunyoda koronavirus infeksiyasini xududlarga tarqalishi, undan kasallanish va vafot etayotganlar  ko‘rsatkichi  jihatidan  jiddiy bosqichga  ko‘tarilmoqda. Xabaringiz bor,  Jahon sog‘liqni saqlash tashkiloti (JSST) tomonidan Xitoyda yangi koronavirus tarqalishi bilan bog‘liq vaziyatni aholi sog‘lig‘ini saqlash sohasidagi xalqaro darajadagi favqulodda vaziyat deb e’lon qilindi. Bundan bir muddat oldin O‘zbekiston Respublikasi Vazirlar Mahkamasida Epidemiyaga qarshi kurash favqulodda komissiyasining yig‘ilishi o‘tkazilgan bo‘lsa, shu yilning 29 yanvarida O‘zbekiston Respublikasi Prezidentining “ O‘zbekiston Respublikasiga koronavirusning yangi  turi kirib kelishi va tarqalishini oldini olish yuzasidan chora- tadbirlar dasturini tayyorlash bo‘yicha respublika maxsus komissiyasining tashkil etish to‘g‘risida” gi Farmoyishi qabul qilindi. 

Bugun, 1 fevral kuni Sog‘liqni saqlash vazirligida ayni masalada  JSSTning O‘zbekistondagi vakolatxonasi bilan hamkorlikda videoselektor yig‘ilishini  o‘tkazildi. Uni Sog‘liqni saqlash vaziri Alisher Shodmonov olib bordi.

Yig‘ilishda Sog‘liqni saqlash vazirligi Xitoydagi epidemik vaziyatdan kelib chiqqan holda O‘zbekiston hududiga koronavirus infeksiyasining kirib kelishi va tarqalishining oldini olish borasida Jahon sog‘liqni saqlash tashkiloti bilan uzluksiz ishlayotgani, hamkorlikda barcha zarur chora-tadbirlar amalga oshirilayotgani ta’kidlandi. Xususan, havo, avtomobil va temir yo‘l transporti ob’ektlarida sanitariya-epidemiologiya va migratsiya nazorati kuchaytirilmoqda. Bu borada qo‘llanma va tavsiyalar ishlab chiqilib, barcha tegishli vazirlik va idoralarga ijro uchun yuborildi. Tunu kun faoliyat ko‘rsatuvchi maxsus shtab faoliyati yo‘lga qo‘yildi. Kasallikka gumon qilingan fuqarolarni ixtisoslashtirilgan davolash muassasalarida chuqurlashtirilgan tibbiy tekshiruvdan o‘tkazilmoqda.

Mamlakatda Davlat chegaralarining kesishish joylarida 52 ta sanitariya-karantin punktlari faoliyat ko‘rsatmoqda. Davlat chegara postlaridan o‘tayotgan fuqarolar tibbiy nazorat ko‘rigidan o‘tkazilmoqda, shuningdek, teplovizor yordamida yo‘lovchilarning tana harorati masofadan turib o‘lchanmoqda va umumiy holati tekshirilmoqda.

Ammo ushbu chora-tadbirlar xavfsizlikni to‘liq kafolatlaydi degani emas, deya qayd etildi  videoselektorda. Negaki, koronavirus infeksiyasi havo tomchilari orqali o‘tishi, insondan insonga yuqishi, shuningdek, kasallikni klinik belgilari  14 kungacha  yashirin kechishi xotirjam bo‘lishga sabab bo‘lmasligiga e’tibor qaratildi. Qolaversa, bugungacha  20 ga yaqin tibbiyoti rivojlangan mamlakatda bu kasallik kuzatilayotganligi vaziyatning naqadar jiddiyligini ko‘rsatib turibdi. 

Shu bois ham, bo‘lib o‘tgan videoselektorda ayni paytga qadar O‘zbekistonda bunday kasallikka chalinish holati umuman kuzatilmaganligiga qaramasdan ehtiyot choralarini yanada kuchaytirish borasida mutasaddilarga aniq topshiriqlar berildi. Jumladan, xorijdan, ayniqsa, Xitoydan kelayotgan fuqarolarni tibbiy ko‘rikdan o‘tkazish, ularning ruyxatini shakllantirish, kasallikning yashirin davri davomida tibbiy nazoratga olish, zahira o‘rinlarini tayyorlash, dori-darmon, dizenfeksiya vositalari va zarur tibbiy anjomlar bilan ta’minlash ustidan nazoratni yanada kuchaytirish, kasallikka qarshi kurashishda tegishli vazirlik va idoralar bilan hamkorlikdagi faoliyatni kuchaytirish kabi qator vazifalar ko‘rsatib o‘tildi.