“O‘zenergoinspeksiya” hukumat bo‘ysunuviga o‘tkaziladi

Elektr energiyasi, neft mahsulotlari va gazdan foydalanishni nazorat qilish inspeksiyasi Vazirlar Mahkamasi bo‘ysunuviga o‘tkaziladi. Bu haqda bugun, 23 avgust kuni qabul qilingan “Yoqilg‘i-energetika tarmog‘ida davlat nazorati tizimini takomillashtirish chora-tadbirlari to‘g‘risida”gi Prezident farmonida belgilangan.

Farmonga ko‘ra, “O‘zenergoinspeksiya”ga quyidagi qo‘shimcha vazifalar yuklandi:

• energiya samaradorligi bo‘yicha xalqaro standartlarni joriy etish va mazkur sohada xalqaro hamkorlikni kengaytirish;
• yillik energiya iste’moli 500 tonna shartli yoqilg‘idan yuqori bo‘lgan barcha sanoat korxonalarida energiya iste’molini boshqarish tizimini  (Energy Management System) joriy etishni nazorat qilish;
• sohada davlat nazoratini amalga oshirish va hisobotlarni yuritish jarayonlarini to‘liq raqamlashtirish;
• energiya auditorlarga malaka sertifikatlarini berish va zamonaviy o‘lchov laboratoriyalari bo‘yicha minimal talablarni belgilash.

Bundan tashqari, “O‘zenergoinspeksiya”ning markaziy apparati tuzilmasida 30 ta shtat birligidan iborat bo‘lgan Energiya samaradorligini oshirish departamenti va Energetika nazorati sohasini raqamlashtirish boshqarmasi tashkil etiladi.

Eslatib o‘tamiz, avvalroq Buxoroda “O‘zenergoinspeksiya” mansabdori 50 ming dollar pora bilan ushlangani xabar qilingandi.