Ai-92 benzini narxi qimmatladi...mi?

Joriy yilning mart oyi o‘rtalarida “O‘zbekneftgaz” kompaniyasiga qarashli UNG Petro yonilg‘i quyish shoxobchalarida Ai-92 benziniga “bahoriy” chegirmalar joriy etilgandi.

Unga ko‘ra, “O‘zbekneftgaz” “zapravka”larida 9 ming 200 so‘m narx qo‘yilgan Ai-92 benzini 7 ming 500 so‘mdan sotila boshlandi. O‘shanda chegirma faqat cheklangan muddatda amal qilishi aytilgan, lekin chegirma muddati qachon tugashi ma’lum qilinmagandi. 

Kuni kecha ijtimoiy tarmoqlarda “O‘zbekneftgaz” “zapravka”larida Ai-92 benzini narxi 1100 so‘mga ko‘tarilgani, ya’ni 8 ming 600 so‘mdan sotilayotgani haqidagi xabarlar tarqaldi. Holatga izoh olish maqsadida QALAMPIR.UZ “O‘zbekneftgaz” manbasi bilan bog‘landi.

“Ai-92 benzini narxi oshmadi, balki “O‘zbekneftgaz” kompaniyasiga qarashli UNG Petro yonilg‘i quyish shoxobchalaridagi chegirmalar to‘xtatildi”, deydi QALAMPIR.UZ manbasi.

Eslatib o‘tamiz, joriy yilning aprel oyida ham Ijtimoiy tarmoqlarda yoqilg‘i quyish shoxobchalari tarmog‘ida AI-92 benziniga chegirmalar yakunlanishi, benzin narxi oshishi haqida xabarlar tarqalgan edi. Energetika vazirligi tashkilot ichida tarqalgan ushbu xabarni rad etib, AI-92 markali avtobenzinining narxi oshmasligini ma’lum qilgan.

Akobir Sayidov