O‘zbekistonning Chexiya va Sloveniyadagi elchilari ishonch yorliqlarini topshirdi

Joriy yilning 13 dekabr kuni O‘zbekistonning Favqulodda va muxtor elchisi Dilshod Axatov Chexiya Prezidenti Pyotr Pavelga ishonch yorliqlarini topshirdi. Bu haqda “Dunyo” axborot agentligi xabar berdi.

Suhbat chog‘ida Pyotr Pavel O‘zbekistonni Chexiyaning xalqaro hamjamiyatdagi muhim hamkorlaridan biri sifatida e’tirof etgan. Chexiya rahbari rasmiy Praganing O‘zbekiston bilan o‘zaro hamkorlikni yanada mustahkamlash va rivojlantirishga bo‘lgan qiziqishi yuqori ekaniga urg‘u bergan.

Shuningdek, O‘zbekistonning Sloveniyadagi Favqulodda va muxtor elchisi Oybek Shaxavdinov Sloveniya Prezidenti Natasha Pirs-Musarga ishonch yorliqlarini topshirdi.

Ma’lumot uchun, bugungi kunga qadar Dilshod Axatov O‘zbekistonning Shveysariya va Chexiyadagi o‘rindoshlik asosida elchisi ham hisoblanadi. O‘zbekistonning Germaniyadagi elchisi Shveysariyada ham mamlakatning rasmiy vakili hisoblanadi. Axatov 2010-2013 yillarda O‘zbekistonning Germaniyadagi elchisi, shuningdek, Shveysariya, Chexiya, Shvetsiya va Ispaniyada o‘rindoshlik asosida elchisi, keyinchalik Tashqi ishlar vaziri o‘rinbosari, 2020-2023 yillarda esa O‘zbekistonning Hindiston, Bangladesh va Nepaldagi elchisi bo‘lib faoliyat yuritgan. 2023 yil 27 sentyabrda esa mamlakatning Germaniyadagi elchisi etib tayinlangandi.

46 yoshli diplomat Oybek Shaxavdinov esa Birmingem universiteti (Buyuk Britaniya), Toshkent davlat yuridik universiteti (magistratura), Moskva davlat xalqaro munosabatlar institutining tarjimonlar tayyorlash kursini tamomlagan. Mehnat faoliyatini Toshkentdagi Jahon iqtisodiyoti va diplomatiya universitetida boshlagan, so‘ngra TIVning Yevropa davlatlari bilan hamkorlik boshqarmasida referentlikdan boshqarma boshlig‘i singari diplomatik xizmatning barcha bosqichlarini bosib o‘tgan. Shuningdek, O‘zbekistonning Bryusseldagi elchixonasida ishlagan. Shaxavdinov O‘zbekistonning Vengriyadagi (qarorgohi Budapesht shahrida joylashgan) birinchi, shuningdek, o‘rindoshlik asosida Xorvatiya, Chernogoriya va Sloveniyadagi elchisi hisoblanadi.