O‘zbekistondagi eng ko‘p imtiyoz olgan korxonalar ochiqlandi

O‘zbekistonda coliq to‘lovchilarning 2024 yil 1-yarim yillik yakuni bo‘yicha eng ko‘p soliq va bojxona imtiyozini olgan korxonalar ma’lum qilindi. Bu haqda Korrupsiyaga qarshi kurashish agentligi xabar berdi.

Qayd etilishicha, umumiy soliq va bojxona imtiyozlari qiymati 63,4 trln so‘mni (2023 yilda 127,1 trln so‘m) tashkil etgan. Ya’ni shuncha mablag‘ korxona va tashkilotlarning ixtiyorida qoldirilgan. 63,5 trln so‘m imtiyozdan 39,0 trln so‘m soliq, 24,4 trln so‘mini bojxona imtiyozlari tashkil etadi.

Navoiy va Olmaliq kon-metallurgiya kombinatlari hamda banklardan tashqari eng ko‘p imtiyozdan foydalangan tashkilotlarning top-35 taligi quyidagicha (milliard so‘mda):

O‘zbekistonda tabiiy gazni markazlashgan tartibda xarid qilish va sotish funksiyasini bajaruvchi UzGasTrade birinchi yarim yilda 1,1 trillion so‘mlik imtiyozlardan foydalangan.

Hisobot davrida UzAirways 1,08 trln so‘m, O‘ztemiryo‘llar 558 mlrd so‘mlik soliq imtiyozidan foydalangan. Markaziy Osiyo – Xitoy gaz quvurlari tarmog‘ining O‘zbekistondan o‘tgan qismi operatori – Asia Trans Gas esa 462,7 mlrd so‘mlik imtiyozlardan foydalangan.

Yanvar-iyun oylarida Enter Engineering pudrat korxonasiga 570 mlrd so‘mga yaqin bojxona imtiyozlari berilgan.

“O‘zbektelekom” 432 mlrd so‘mlik, shamol elektr stansiyasini qurayotgan Masdar kompaniyasining (BAA) O‘zbekistondagi sho‘’basi – Shamol Zarafshon Energy 375 mlrd so‘mlik, temiryo‘l relslari uchun temirbeton shpal ishlab chiqaruvchi RWS Optimum 353 mlrd so‘mlik imtiyoz olgan. Holos bojxona brokeri 315 mlrd so‘mlik bojxona imtiyozlaridan foydalangan.

6 oy davomida UzAuto Motors – 317 mlrd so‘mlik imtiyozlardan, BYD Uzbekistan Factory 274 mlrd so‘mlik bojxona imtiyozlarini olgan.