O‘zbekistonda yangi yo‘l belgilari paydo bo‘ladi

Yangi tahrirdagi Yo‘l harakati qoidalarining 1-ilovasi 5-axborot-ko‘rsatkich turiga mansub bo‘lgan yo‘l belgilari orasiga yangilari qo‘shilgan. 

Bunda 5.15 “To‘xtab turish joyi” belgisi eski tahrirda mavjud edi. Ushbu belgiga qo‘shimcha tarzda 5.15.1., 5.15.2. va 5.15.3. kiritildi:

5.15.1 “Pullik to‘xtab turish joyi” yo‘l belgisi tadbirkorlik sub’ektlari tomonidan tashkil etilgan pullik avtoturargohlar, avtomobil qo‘yish joylari oldida;

5.15.2. esa “Yer usti avtomobil qo‘yish joyi” yo‘l belgisi bo‘lib,  ko‘p qavatli avtoturargohlar oldiga yoki yaqiniga;

 5.15.3. “Yer osti avtomobil qo‘yish joyi” yo‘l belgisi yer osti avtomobil qo‘yish joylari, avtoturargohlarga kirishdan oldin o‘rnatiladi. 

Ma’lumot uchun, yangi tahrirdagi Yo‘l harakati qoidalari 2022 yil 1 maydan boshlab amalga kiritiladi.

Eslatib o‘tamiz, endilikda “Haydovchilikni endi boshlagan” – “Haydovchilik malakasi yetarli bo‘lmagan” haydovchilik staji 2 yildan kam bo‘lgan haydovchilar boshqarayotgan mexanik transport vositalarida “❗️” belgisining tasviri tushirilgan, sariq rangli, tomonlari 150 millimetr bo‘lgan kvadrat ko‘rinishidagi belgi haydovchining xohishiga ko‘ra o‘rnatiladi. 

Biroq, avtomobil oynasiga bundan boshqa yozuvlarni yozish taqiqlanadi. Reklama maqsadidagi bannerlar bundan mustasno.