O‘zbekiston va Qozog‘iston chegara to‘g‘risida kelishuv imzolaydi

Qozog‘iston va O‘zbekiston o‘rtasida ikki davlat chegarasini demarkatsiya qilish to‘g‘risidagi shartnoma loyihasi tayyorlandi. Bu haqda “Zakon” nashri xabar berdi.

Hujjatdan kelib chiqadiki, Qozog‘iston-O‘zbekiston davlat chegarasining boshlang‘ich nuqtasi Qozog‘iston, Qirg‘iziston va O‘zbekiston davlat chegaralarining tutashgan joyi hisoblanadi.

Qozog‘iston-O‘zbekiston davlat chegarasining so‘nggi nuqtasi Qozog‘iston, Turkmaniston va O‘zbekiston davlat chegaralarining tutashgan joyi hisoblanadi.

Davlat chegarasining demarkatsiyalangan chizig‘ining uzunligi 2356,666 km. Tomonlar davlat chegarasi chizig‘iga jami 1301 ta chegara belgilarini o‘rnatdi.

Tomonlar jami 1672 ta chegara ustunlari o‘rnatgan, jumladan, asosiylari – 868 ta, shundan Qozog‘iston tomoni – 437 ta, O‘zbekiston tomoni – 431 ta; oraliq chegara ustunlari – 804 ta, shundan Qozog‘iston tomoni – 428 ta, O‘zbekiston tomoni – 376 ta.

Bitim kuchga kirganidan keyin tomonlar har 10 yilda bir marta davlat chegarasi chizig‘i belgilash bo‘yicha birgalikda tekshirish o‘tkazadi. Tomonlarning kelishuviga ko‘ra tekshirish shartlari o‘zgartirilishi, shuningdek, uning alohida uchastkalarida davlat chegarasi chizig‘ining belgilanishini birgalikda tekshirish ham o‘tkazilishi mumkin.

Hujjatga muvofiq, tomonlardan hech biri bir tomonlama tartibda davlat chegarasi chizig‘i to‘g‘risida Shartnomada ko‘rsatilmagan chegara yoki davlat chegarasini belgilovchi boshqa belgilarni o‘rnatishi mumkin emas.

Davlat rahbarining Shartnomani imzolash to‘g‘risidagi farmoni loyihasi Qozog‘iston Respublikasi Prezidenti tomonidan ko‘rib chiqish uchun kiritildi.