O‘zbekiston 2020 yilni iqtisodiy o‘sish bilan yakunlaydi – Bloomberg

2020 yilda iqtisodi o‘sishi kutilayotgan sanoqli mamlakatlar qatorida bo‘lgan O‘zbekiston ikkinchi marotaba yevroobligatsiyalar bozoriga chiqdi. Joriy yilning 19 noyabr kuni  ochilgan savdoda O‘zbekiston muddati 10 yil bo‘lgan 555 million dollarlik obligatsiyalarni 3,7 % stavkasida sotishga muvaffaq bo‘lgan. Bundan tashqari, O‘zbekiston ilk bor mahalliy valyutada muddati 3 yil bo‘lgan qiymati 2 trln so‘mlik (193 mln dollar) obligatsiyalarni ham sotishga muvaffaq bo‘lgan. 

Bloomberg xulosasiga ko‘ra, O‘zbekistonning xalqaro moliya bozordagi muvaffaqiyati bir necha sabablarga bog‘liq. Fitch Ratings va S&P Global Ratings kabi xalqaro investitsion reytinglarda past darajada bo‘lsa-da, Xalqaro valyuta jamg‘armasi ekspertlari xulosasiga ko‘ra, O‘zbekiston 2020 yilni iqtisodiy o‘sish bilan yakunlaydigan sanoqli mamlakatlar qatorida bo‘ladi.

Moskvada joylashgan “Renessans Kapital” tahliliy agentligi bosh iqtisodchisi Sofya Donets xulosasiga ko‘ra, O‘zbekistonga koronavirusni yengishda uning nisbatan yosh aholisi hamda iqtisodning qishloq xo‘jaligi, sanoat va qurilish tomon burilishi sabab bo‘lgan.

Eslatib o‘tamiz, O‘zbekiston ilk bor xalqaro obligatsiyalar bozoriga 2019 yilning fevral oyida chiqqan edi. O‘shanda respublika 10 yillik obligatsiyalarni 5% daromad miqdori bilan emissiya qilgan edi.

Berlinda joylashgan Capitulum Asset Management kompanyasining bosh sarmoyaviy direktori Luts Remeyer aytishiga qaraganda, O‘zbekistonning birinchi yevrobondlar bozoriga chiqishi muvaffaqiyatli o‘tishiga birinchidan - ilk emissiya bo‘lgani va ikkinchidan respublikaning tashqi qarzi miqdori kam bo‘lgani sabab bo‘lgan.  

Ikkinchi emissiyada O‘zbekistonga Citigroup Inc., “Gazprombank”, JPMorgan Chase & Co., Societe Generale SA, VTB Kapital va boshqa moliyaviy korxonalar menedjer va bukranner sifatida yordam berishmoqda.