Ukraina Zalujniyni ishdan bo‘shatish rejalari haqida AQSHni xabardor qildi – OAV 

Ukraina rasmiylari Vashingtonni Ukraina Qurolli kuchlari bosh qo‘mondoni Valeriy Zalujniyni ishdan bo‘shatish rejalari haqida ogohlantirdi. Bu haqda bugun, 3 fevral kuni AQSH Prezidenti ma’muriyatidagi ikki manbaga tayanib, “Reuters” xabar berdi.

"Oq uy amaldorlar bo‘yicha suveren qarorlar qabul qilish Ukrainaga bog‘liqligini aytdi", deydi manbalardan biri. 

Prezident Jo Bayden ma’muriyati bu borada rasmiy bayonot bermadi. 

“Zalujniy va Ukraina Prezidenti Vladimir Zelenskiy o‘rtasida urush olib borishning kelajakdagi strategiyasi, shuningdek, bir qator boshqa masalalar bo‘yicha kelishmovchiliklar mavjud”, deya qayd etadi “Reuters”. 

Bundan tashqari, Zalujniyning ishdan bo‘shatilishi o‘tgan yilning yoz-kuz oylarida Ukraina Qurolli Kuchlari Rossiya tomonidan bosib olingan hududlarning muhim qismini qaytarib bera olmagan Ukrainaning muvaffaqiyatsiz qarshi hujumi natijasi bo‘lishi mumkin.

Manbalardan biriga ko‘ra, Zelenskiy va Zalujniy o‘rtasida qo‘shimcha chaqiruv masalasida ham kelishmovchiliklar yuzaga kelgan, bu vaqtda general 500 ming kishini safarbar qilishni taklif qilgan. Zelenskiy bu taklifni rad etgan. 

"Hozirda ikkala tomon ham kelajak qanday bo‘lishini tushunish uchun biroz pauza qildi. Hozircha status-kvo saqlanib qolmoqda", deydi manba.

Ma’lumot uchun, 1 fevral kuni Zalujniy Amerikaning CNN telekanali saytida maqola chop etib, unda Ukraina rahbariyati yetarlicha askarni safarbar eta olmaganini eslatib o‘tgan. G‘arb va Ukraina ommaviy axborot vositalari xabarlariga ko‘ra, Zalujniy shu hafta Zelenskiyning iste’foga chiqish haqidagi iltimosini rad etgan.